دنیا بھر کے کرکٹ شائقین کے لیے بڑی خوشخبری سامنے آگئی ہے، جہاں روایتی حریف پاکستان اور بھارت ایک مرتبہ پھر کرکٹ کے میدان میں آمنے سامنے ہوں گے۔ دونوں ممالک کے درمیان تاریخی کرکٹ مقابلے کی وجہ سے پاک بھارت میچ ہمیشہ دنیا بھر کے شائقین کی خصوصی توجہ کا مرکز رہتا ہے۔
پاکستان اور بھارت کے درمیان باہمی کرکٹ سیریز طویل عرصے سے نہ ہونے کے باعث دونوں ٹیمیں اب زیادہ تر کثیر ملکی ٹورنامنٹس میں ہی ایک دوسرے کے خلاف کھیلتی ہیں۔ یہی وجہ ہے کہ جب بھی دونوں روایتی حریف میدان میں اترتے ہیں تو شائقین کرکٹ میں غیر معمولی جوش و خروش پیدا ہوجاتا ہے۔
اب کرکٹ مداحوں کے لیے ایک اور بڑی خبر سامنے آئی ہے کہ 10 اکتوبر کو دبئی میں پاکستان اور بھارت کے درمیان ایک اور سنسنی خیز مقابلہ ہونے جارہا ہے۔ یہ میچ ورلڈ چیمپئن شپ آف لیجنڈز کے تیسرے سیزن میں کھیلا جائے گا، جس میں ماضی کے کئی معروف کرکٹ اسٹارز ایک بار پھر ایکشن میں دکھائی دیں گے۔پاکستان چیمپئنز کی جانب سے کئی معروف پاکستانی کھلاڑی میدان میں اتریں گے۔ اسکواڈ میں بوم بوم شاہد آفریدی، کامران اکمل، سہیل تنویر، شرجیل خان اور آصف علی جیسے معروف نام شامل ہیں۔ ان تجربہ کار اور جارحانہ انداز میں کھیلنے والے کھلاڑیوں کی موجودگی کے باعث پاک بھارت میچ کے حوالے سے شائقین کی دلچسپی مزید بڑھ گئی ہے۔ورلڈ چیمپئن شپ آف لیجنڈز کا تیسرا سیزن 3 سے 18 اکتوبر تک دبئی اور شارجہ کے میدانوں میں کھیلا جائے گا۔ ٹورنامنٹ کا افتتاحی میچ پاکستان چیمپئنز اور بنگلہ دیش کے درمیان ہوگا۔شیڈول کے مطابق پاکستان چیمپئنز 5 اکتوبر کو آسٹریلیا، 6 اکتوبر کو ویسٹ انڈیز، 10 اکتوبر کو بھارت، 12 اکتوبر کو جنوبی افریقا جبکہ 14 اکتوبر کو انگلینڈ کے خلاف میدان میں اترے گی۔پاکستان چیمپئنز کے مالک کامل خان کا کہنا ہے کہ ایونٹ کی تیاریاں بھرپور انداز میں جاری ہیں۔ شائقین کو امید ہے کہ لیجنڈری کرکٹرز سے سجا یہ ٹورنامنٹ ماضی کے یادگار لمحات ایک بار پھر زندہ کرے گا، جبکہ پاکستان اور بھارت کے درمیان 10 اکتوبر کا مقابلہ ٹورنامنٹ کا سب سے زیادہ توجہ حاصل کرنے والا میچ ثابت ہوسکتا ہے۔
