بیان میں مزید کہا گیا ہے کہ 1965ء کی جنگ کے دوران برکی کے محاذ پر میجر راجہ عزیز بھٹی نے دشمن کے ناپاک عزائم کو خاک میں ملاتے ہوئے جس بے مثال جرأت اور بہادری کا مظاہرہ کیا، وہ پاکستانی فوج کی پیشہ ورانہ مہارت اور دفاعِ وطن کے لیے ہر قربانی دینے کے جذبے کا مظہر ہے۔ انہوں نے دشمن کی شدید گولہ باری اور ٹینکوں کی یلغار کے سامنے سیسہ پلائی دیوار بن کر پانچ روز تک وطنِ عزیز کے ایک ایک انچ کا دفاع کیا اور پیچھے ہٹنے سے انکار کرتے ہوئے جامِ شہادت نوش کیا۔
عسکری قیادت کا کہنا ہے کہ مادرِ وطن کا دفاع اور اس کی جغرافیایی سالمیت کو برقرار رکھنا مسلح افواج کا اولین فریضہ ہے، اور شہداء کا خون اس ملک کی آزادی کی سب سے بڑی ضمانت ہے۔ ملک کی خاطر جانیں قربان کرنے والے شہداء کی قربانیوں کو کبھی فراموش نہیں کیا جا سکتا۔ پوری پاکستانی قوم اپنے ان ہیروز کو سلام پیش کرتی ہے جنہوں نے اپنی جانوں کا نذرانہ دے کر ملک کو پرامن بنایا۔
یومِ شہادت کے موقع پر ملک بھر میں تقریبات کا انعقاد کیا گیا ہے جن میں میجر راجہ عزیز بھٹی شہید کے مزار پر پھول چڑھائے گئے، فاتحہ خوانی کی گئی اور ان کی عظیم خدمات کو شاندار خراجِ عقیدت پیش کیا گیا۔ اس عزم کا اعادہ کیا گیا ہے کہ وطنِ عزیز کے چپے چپے کے تحفظ کے لیے کسی بھی قربانی سے دریغ نہیں کیا جائے گا اور شہداء کے ادھورے مشن کو ہر قیمت پر تکمیل تک پہنچایا جائے گا۔
