رمضان میں ڈرائیونگ لائسنس بنوانے والوں کے لئے اہم خبر آگئی ، ہر پاکستانی کو صرف اصلی شناختی کارڈ کے ذریعے لائسنسنگ سروسز فراہم کی جا رہی ہے۔ تفصیلات کے مطابق راولپنڈی میں رمضان المبارک کے دوران شہریوں کو ڈرائیونگ لائسنس کی سہولیات مسلسل جاری ہیں۔ سی ٹی او راولپنڈی نے بتایا کہ رواں ماہ اب تک 67 ہزار 300 سے زائد شہریوں کو لائسنسنگ سہولیات فراہم کی جا چکی ہیں، جن میں 13 ہزار 500 سے زائد شہریوں کو نئے ڈرائیونگ لائسنس جاری کیے گئے۔ افطار کے وقت لائسنسنگ سینٹرز میں موجود شہریوں کو افطاری بھی فراہم کی جا رہی ہے۔ سی ٹی او فرحان اسلم نے کہا کہ شہری ہمارے لیے اللہ کے مہمان ہیں اور خدمت کا یہ موقع باعث سعادت ہے۔ سی ٹی او نے مزید بتایا کہ ہر پاکستانی کو صرف اصلی شناختی کارڈ کے ذریعے لائسنسنگ سروسز فراہم کی جا رہی ہے اور موٹر سائیکلسٹ کو ایک ہی دن میں لرنر پرمٹ و لائسنس جاری کیا جا رہا ہے، شہریوں کو میرٹ اور عزت دارانہ طریقے سے لائسنس کی فراہمی ہماری اولین ترجیح ہے۔ فرحان اسلم کا کہنا تھا کہ دوران ڈرائیونگ، ڈرائیور کے پاس لائسنس ہونا خود اعتماد ڈرائیونگ کی پہچان ہے۔