خیبر پختونخوا کے ضلع ڈیرہ اسماعیل خان کی تحصیل درازندہ میں واقع چیک پوسٹ پر ہونے والے بزدلانہ دہشت گردانہ حملے میں جامِ شہادت نوش کرنے والے تینوں شہداء کی نمازِ جنازہ پورے سرکاری اعزاز کے ساتھ ادا کر دی گئی ہے۔ اس پروقار اور رقت آمیز نمازِ جنازہ میں پاک فوج کے اعلیٰ عسکری حکا، پولیس کے ضلعی افسران، کسٹمز محکمے کے اعلیٰ حکام، شہداء کے ورثاء اور زندگی کے مختلف شعبوں سے تعلق رکھنے والے افراد کی کثیر تعداد نے شرکت کی۔ نمازِ جنازہ کے دوران فضا انتہائی سوگوار تھی اور شرکاء کی آنکھیں نم تھیں۔شہید ہونے والوں میں کسٹمز کا فرض شناس حوالدار اور دیگر قانون نافذ کرنے والے اداروں کے جوان شامل ہیں جنہوں نے مادرِ وطن کے دفاع اور ملک دشمن عناصر کے ناپاک عزائم کو خاک میں ملاتے ہوئے اپنی جانوں کا نذرانہ پیش کیا۔ نمازِ جنازہ کی ادائیگی کے بعد پاک فوج کے دستوں نے شہداء کے جسدِ خاکی کو سلامی پیش کی، اور ان کے جسدِ خاکی کو ان کے آبائی علاقوں کے لیے روانہ کر دیا گیا جہاں انہیں پورے فوجی اور سرکاری اعزاز کے ساتھ سپردِ خاک کیا جائے گا۔ اس موقع پر سکیورٹی کے انتہائی سخت انتظامات کیے گئے تھے۔
مقامی عمائدین اور شہریوں نے شہداء کی قربانیوں کو خراجِ تحسین پیش کرتے ہوئے اس عزم کا اعادہ کیا ہے کہ دہشت گردی کے خلاف جنگ میں پوری قوم اپنی مسلح افواج اور قانون نافذ کرنے والے اداروں کے شانہ بشانہ کھڑی ہے۔ شرکاء کا کہنا تھا کہ وطن کے یہ مکرّم سپوت ہمارا فخر ہیں اور ان کا خون رائیگاں نہیں جائے گا۔ دریں اثنا، اعلیٰ سول اور عسکری قیادت نے واقعے کی شدید مذمت کرتے ہوئے سوگوار خاندانوں سے گہرے دکھ اور تعزیت کا اظہار کیا ہے اور زخمیوں کی جلد صحت یابی کے لیے دعا کی ہے۔
