ملک میں تیل کی پیداوار کے حوالے سے اچھی خبر

تفصیلات کے مطابق او جی ڈی سی ایل نے کنر 12 اور 6 آئل فیلڈ سے تیل کی پیداوار میں اضافے کا اعلان کیا ہے، دونوں آئل فیلڈز سے تقریباً یومیہ 1160 بیرل اضافی خام تیل ملے گا۔ کمپنی اعلامیہ میں کہا گیا ہے کہ کنر12 حیدر آباد میں پمپ کو تبدیل کرنے سے پروڈکشن میں اضافہ ہوا ہے، اور اب کنر 12 کنویں سے 1060 کی بجائے یومیہ 1820 بیرل خام تیل ملے گا۔ جیٹ پمپ کی جگہ الیکٹریکل پمپ لگائے جانے سے پیداوار میں یومیہ 760 بیرل خام تیل کا اضافہ ہوا ہے۔ اسی طرح کنر 6 حیدر آباد کنویں سے یومیہ 400 بیرل خام تیل اضافی مل سکے گا، کنر آئل فیلڈ 6 میں خام تیل کے کنوئیں کو پانی کی زیادہ مقدار کی وجہ سے بند کر دیا گیا تھا، جسے دوبارہ آرٹیفیشل لفٹ سسٹم کے ذریعے بحال کر دیا گیا ہے۔ اعلامیے کے مطابق ان دونوں آئل فیلڈ کے 100 فی صد حصص کمپنی کے پاس ہیں۔