خوشاب:پنجاب کے ضلع خوشاب کے نواحی علاقے اور تاریخی گاؤں مردوال میں ایک رہائشی مکان سے ایک مرد اور خاتون کی پراسرار لاشیں برآمد ہوئی ہیں، جنہیں مبینہ طور پر شدید تشدد کا نشانہ بنایا گیا ہے۔ اس اندمناک واقعے کی اطلاع ملتے ہی علاقے میں شدید خوف و ہراس پھیل گیا جبکہ پولیس اور قانون نافذ کرنے والے اداروں کی بھاری نفری فوری طور پر جائے وقوعہ پر پہنچ گئی۔ ابتدائی اطلاعات کے مطابق مرنے والے دونوں افراد کے جسموں پر تیز دھار آلات کے نشانات اور تشدد کے واضح آثار پائے گئے ہیں، جس سے یہ شبہ ظاہر کیا جا رہا ہے کہ یہ قتل کا ایک اور ہولناک واقعہ ہے۔
مقامی پولیس ذرائع کا کہنا ہے کہ پولیس نے فوری کارروائی کرتے ہوئے دونوں لاشوں کو اپنی تحویل میں لے لیا ہے اور انہیں پوسٹ مارٹم کے لیے قریبی اسپتال منتقل کر دیا گیا ہے۔ پولیس کے اعلیٰ حکام کا کہنا ہے کہ موت کی اصل وجوہات اور وقت کا تعین پوسٹ مارٹم رپورٹ موصول ہونے کے بعد ہی حتمی طور پر ہو سکے گا۔ دوسری جانب، فرانزک سائنس ایجنسی کی ماہر ٹیم نے بھی جائے وقوعہ پر پہنچ کر تمام ضروری شواہد اکٹھے کر لیے ہیں، جن میں فنگر پرنٹس اور دیگر تکنیکی شواہد بھی شامل ہیں تاکہ ملزمان تک رسائی حاصل کی جا سکے۔
واقعے کی سنگین نوعیت کو دیکھتے ہوئے ضلعی پولیس افسر (ڈی پی او) خوشاب نے نوٹس لے لیا ہے اور اس واقعے کی ہر پہلو سے تحقیقات کے لیے ایک خصوصی ٹیم (جے آئی ٹی) تشکیل دینے کا حکم دے دیا ہے۔ پولیس کا کہنا ہے کہ ابتدائی طور پر قتل کے محرکات جاننے کے لیے مقتولین کی شناخت اور ان کے گھریلو پس منظر کا جائزہ لیا جا رہا ہے۔ پولیس اس بات کی بھی تحقیقات کر رہی کے آیا یہ واقعہ خاندانی رنجش کا نتیجہ ہے یا اس کے پیچھے کوئی اور محرکات ہیں۔ علاقے کے مکینوں نے پولیس سے مطالبہ کیا ہے کہ اس گھناؤنے جرم میں ملوث اصل ملزمان کو جلد از جلد بے نقاب کر کے کیفر کردار تک پہنچایا جائے۔
