پاکستان نے میڈیکل سائنس کے شعبے میں اہم کامیابی حاصل کرتے ہوئے پہلی بار مقامی طور پر جدید ایکسرے مشین تیار کر لی ہے۔ چین کے اشتراک سے تیار کی گئی اس مشین کو “I Care 50X” کا نام دیا گیا ہے، جس کے تمام پرزے مقامی مارکیٹ میں بھی دستیاب ہوں گے۔ یہ مشین ہیلتھ ایشیا ایکسپو 2025ء میں توجہ کا مرکز بنی رہی، جہاں شرکاء کو اس کی جدید خصوصیات اور افادیت سے آگاہ کیا گیا۔عالمی مارکیٹ میں اس مشین کی قیمت 20 سے 25 ملین روپے ہے، جبکہ پاکستان میں اس کی تیاری پر صرف 3 سے 4 ملین روپے لاگت آئی ہے۔ ماہرین کے مطابق “I Care 50X” جدید ٹیکنالوجی سے لیس ہے، جو صرف 10 سیکنڈ میں ایکسرے کی فوٹیج فراہم کرتی ہے۔ اس کی ریڈیالوجی شعاعوں کی شدت کم ہونے کے باعث مریضوں کے لیے یہ زیادہ محفوظ ثابت ہوتی ہے۔یہ منصوبہ 2020 میں شروع کیا گیا تھا اور تقریباً پانچ سال کی محنت کے بعد یہ کامیابی حاصل ہوئی۔ ملک کے مختلف اسپتالوں میں اس مشین کا استعمال شروع ہو چکا ہے، جو پاکستان کی میڈیکل انڈسٹری کے لیے ایک بڑی پیش رفت قرار دی جا رہی ہے۔
