پاک افغان سرحد پر افغان فورسز کی فائرنگ اور پاکستانی فورسز کے مؤثر جوابی کارروائی کے بعد سعودی عرب نے سرحدی کشیدگی پر گہری تشویش کا اظہار کیا ہےسعودی وزارتِ خارجہ کی جانب سے جاری بیان میں کہا گیا ہے کہ اسلامی جمہوریہ پاکستان اور افغانستان کے درمیان سرحدی علاقوں میں حالیہ جھڑپوں اور بڑھتی کشیدگی پر سعودی عرب کو شدید تشویش ہے۔بیان میں مزید کہا گیا کہ دونوں ممالک کو چاہیے کہ وہ کشیدگی میں اضافے سے گریز کریں اور بات چیت، حکمت اور صبر کا راستہ اختیار کریں تاکہ خطے میں امن و استحکام کو برقرار رکھا جا سکےسعودی حکومت نے اس موقع پر یہ بھی واضح کیا کہ وہ ان تمام علاقائی و عالمی کوششوں کی حمایت جاری رکھے گی جو امن، استحکام اور خوشحالی کے فروغ کا باعث بنیں، خاص طور پر پاکستانی اور افغان عوام کے بہتر مستقبل کے لیے۔سعودی وزارتِ خارجہ کے مطابق، سعودی عرب خطے میں امن و سلامتی کو یقینی بنانے کا خواہشمند ہے اور چاہتا ہے کہ پاکستان اور افغانستان کے تعلقات میں بہتری آئے تاکہ دونوں قومیں خوشحالی کے راستے پر گامزن ہو سکیں۔
