ایران نے پاکستان اور افغانستان کے درمیان حالیہ سرحدی کشیدگی پر گہری تشویش کا اظہار کرتے ہوئے تنازع کے حل کے لیے ثالثی (میڈیئیشن) کی پیشکش کر دی ہے۔ایرانی وزارتِ خارجہ کے ترجمان اسماعیل بقائی نے اپنے ایک بیان میں کہا کہ ایران کو پاک افغان سرحد پر بڑھتی ہوئی کشیدگی پر تشویش ہے۔ انہوں نے زور دیا کہ ہر ملک کی علاقائی سالمیت اور قومی خودمختاری کا احترام لازمی ہے۔ترجمان کے مطابق، ایران چاہتا ہے کہ پاکستان اور افغانستان فوری طور پر مذاکرات کے ذریعے تنازع کم کریں، اور ایران اس سلسلے میں اپنا کردار ادا کرنے کے لیے تیار ہے تاکہ خطے میں امن قائم رہے۔ایران سے قبل سعودی عرب اور قطر نے بھی پاک افغان سرحدی صورتحال پر تشویش کا اظہار کرتے ہوئے صبر و تحمل اور بات چیت کے ذریعے مسئلہ حل کرنے کی اپیل کی تھی۔
یاد رہے کہ گزشتہ رات پاک افغان سرحد پر افغان فورسز کی جانب سے شدید فائرنگ کی گئی تھی، جس کا پاکستانی فورسز نے بھرپور جواب دیا، نتیجے میں متعدد افغان فوجی ہلاک ہوئے۔
