حکومت پنجاب نے آشوب چشم کے مریضوں کے علاج اور رہنمائی کے لیے ہیلپ لائن قائم کرتے ہوئے سرکاری ہسپتالوں میں آئی سرجنز کو 24 گھنٹے الرٹ رہنے کی ہدایت کردی۔ میڈیا رپورٹس کے مطابق پرائمری و سیکنڈری ہیلتھ کیئر کے وزیر ڈاکٹر جمال ناصر نے کہا کہ آشوب چشم کے مریض علاج اور رہنمائی کے لیے ہیلپ لائن 1033 پر رابطہ کریں، صوبے بھر کے سرکاری ہسپتالوں میں آئی سرجنز کو 24 گھنٹے الرٹ رہنے کی ہدایت کر دی گئی ہے، تمام ہسپتالوں میں آئی ڈراپس وافر مقدار میں مہیا کر دیے گئے ہیں انہوں نے کہا کہ آشوب چشم خطرناک نہیں اور نہ ہی اس سے بینائی متاثر ہونے کا خدشہ ہے، آشوب چشم کا مرض 8 سے 10 دن میں خود بخود ٹھیک ہو جاتا ہے، شہری انکھوں کی صفائی کا خیال رکھیں، تیز دھوپ اور گرد و غبار سے آنکھوں کو بچائیں، نیز آشوب چشم میں مبتلا شخص کے کپڑے اور تولیہ وغیرہ علیحدہ رکھیں اسی حوالے سے محکمہ پرائمری ہیلتھ پنجاب نے بتایا ہے کہ رواں سال پنجاب کے 36 اضلاع میں آشوب چشم کے مریضوں کی کل تعداد 3 لاکھ 95 ہزار 929 ہوچکی ہے، گز شتہ 24 گھنٹوں کے دوران صوبے بھر میں آشوب چشم کے 1 ہزار 134 نئے مریض رپورٹ ہوئے،رواں سال لاہور میں آشوب چشم کے 23 ہزار 633 اور گزشتہ روز 236 نئے مریض سامنے آئے، رواں سال آشوب چشم کے سب سے زیادہ مریض بہاولپور میں 77 ہزار 672 رپورٹ ہوئے، جہاں گزشتہ روز آشوب چشم کے 34 نئے مریض سامنے آئے محکمہ پرائمری ہیلتھ پنجاب سے معلوم ہوا ہے کہ رواں سال ملتان میں آشوب چشم کے کل 16 ہزار 464 مریض رپورٹ ہوئے، ملتان میں گزشتہ روز آشوب چشم کے 113 نئے مریض سامنے آئے، رواں سال فیصل آباد میں آشوب چشم کے کل مریضوں کی اب تک تعداد 31 ہزار 006 رہی، گزشتہ روز آشوب چشم کے 35 نئے مریض سامنے آئے، رواں سال راولپنڈی میں آشوب چشم کے کل 9182 مریض رپورٹ ہوئے اور گزشتہ روز آشوب چشم کے 63 نئے مریضوں کی اطلاع دی گئی۔
