سکھر (سٹاف رپورٹر) حکومتِ سندھ کے وزیر برائے یونیورسٹیز اینڈ بورڈز محمد اسماعیل راہو نے اروڑ یونیورسٹی آف آرٹ، آرکیٹیکچر، ڈیزائن اینڈ ہیریٹیج، سکھر میں قائم کی گئی جدید سینٹرل لائبریری کا باقاعدہ افتتاح کر دیا۔ اس پروقار تقریب میں تعلیمی و تحقیقی شعبے کے لیے متعدد اہم ڈیجیٹل اقدامات کا بھی آغاز کیا گیا۔
افتتاحی تقریب کے موقع پر یونیورسٹی انتظامیہ کی جانب سے ادارے کی نئی سرکاری ویب سائٹ اور طلبہ کی رہنمائی کے لیے خصوصی طور پر تیار کردہ ”اروڑ کیریئر کنیکٹ پورٹل“ کا بھی باضابطہ اجرا کیا گیا۔ اس پورٹل کے قیام کا بنیادی مقصد زیرِ تعلیم طلبہ اور فارغ التحصیل سابق طلبہ (ایلمنائی) کو جدید دور کے تقاضوں کے مطابق روزگار کے مواقع، انٹرن شپس اور پیشہ ورانہ رہنمائی ایک ہی ڈیجیٹل پلیٹ فارم پر مہیا کرنا ہے تاکہ نوجوان باآسانی عملی میدان میں قدم رکھ سکیں۔
صوبائی وزیر محمد اسماعیل راہو نے تقریب سے خطاب کرتے ہوئے کہا کہ سندھ حکومت صوبے میں اعلیٰ تعلیم کے فروغ اور تعلیمی اداروں میں جدید ترین سہولیات کی فراہمی کے لیے تمام وسائل بروئے کار لا رہی ہے۔ انہوں نے کہا کہ اروڑ یونیورسٹی آرٹ، فنِ تعمیر، ڈیزائننگ اور ثقافتی ورثے کے تحفظ کے میدان میں ایک منفرد شناخت قائم کر رہی ہے اور اس قسم کی جدید لائبریری و ڈیجیٹل پورٹلز نوجوانوں کو تحقیق اور نئی صلاحیتیں سیکھنے کے بہترین مواقع فراہم کریں گے۔
اس موقع پر سیکریٹری یونیورسٹیز اینڈ بورڈز محمد عباس بلوچ نے بھی شرکت کی اور یونیورسٹی میں تعلیمی معیار کو مزید بلند کرنے کے عزم کا اعادہ کیا۔ تقریب میں یونیورسٹی کے اعلیٰ حکام، فیکلٹی ممبران، میڈیا نمائندگان اور طلبہ کی بڑی تعداد موجود تھی۔ شرکا نے یونیورسٹی کے اس اقدام کو سراہتے ہوئے امید ظاہر کی کہ نئی سینٹرل لائبریری اور کیریئر پورٹل سے خطے کے طلبہ کو تدریسی و پیشہ ورانہ امور میں بھرپور مدد ملے گی۔
