اقوام متحدہ کی سلامتی کونسل سوموار کو ہنگامی اجلاس منعقد کرے گی، جس میں وینزویلا میں امریکی فوجی کارروائی اور عالمی امن و سلامتی کو لاحق خطرات پر غور کیا جائے گا۔
سیکریٹری جنرل انتونیو گوٹریس نے خبردار کیا ہے کہ وینزویلا میں حالیہ پیش رفت عالمی قوانین کے لیے خطرناک مثال بن سکتی ہے۔ ترجمان کے مطابق، سیکریٹری جنرل کو خدشہ ہے کہ امریکی اقدام سے خطے میں عدم استحکام پیدا ہو سکتا ہے اور یہ اقوام متحدہ کے چارٹر کے اصولوں کی خلاف ورزی ہے۔
اجلاس کولمبیا کی درخواست پر بلایا گیا، جس کی حمایت چین اور روس نے بھی کی ہے۔ وینزویلا نے بھی باضابطہ طور پر سلامتی کونسل سے رابطہ کیا ہے۔ اجلاس میں عالمی امن اور سلامتی پر اثر انداز ہونے والے خطرات پر تبادلہ خیال ہوگا اور سیکریٹری جنرل ممبران کو بریفنگ دیں گے۔
وینزویلا نے امریکی اقدام کو اپنی خودمختاری کے خلاف جارحیت قرار دیا ہے اور کہا ہے کہ یہ کارروائی ملک کے قدرتی وسائل، خصوصاً تیل کے ذخائر پر قبضے کی کوشش ہے۔ چین اور روس نے بھی امریکی اقدام کی سخت مذمت کی ہے اور اسے عالمی قانون کی کھلی خلاف ورزی قرار دیا ہے۔
دوسری جانب، امریکہ کا موقف ہے کہ یہ کارروائی سیکیورٹی اور جرائم سے نمٹنے کے لیے کی گئی ہے، لیکن کئی ممالک کا کہنا ہے کہ کسی بھی ریاستی سربراہ کو طاقت کے ذریعے ہٹانا اقوام متحدہ کے چارٹر کی خلاف ورزی ہے۔
سفارتی حلقوں کے مطابق، سلامتی کونسل کے اجلاس میں سخت اختلافات کا امکان ہے اور کسی بھی مشترکہ قرارداد کی منظوری کا امکان کم ہے۔
