اٹک کی انسدادِ دہشتگردی عدالت کے جج امجد علی شاہ نے 26 نومبر احتجاج کیس کا فیصلہ سناتے ہوئے پی ٹی آئی کے چار کارکنان کو سزا سنادی۔
عدالتی ریکارڈ کے مطابق مقدمہ تھانہ انجرا اٹک میں درج تھا جس میں جلاؤ گھیراؤ کی دفعات شامل تھیں۔ عدالت نے فیصلہ سناتے ہوئے عامر خان، سردار خان، خان محمد اور جاوید اقبال کو 4، 4 ماہ قید کی سزا سنائی۔
سماعت کے دوران پراسیکیوٹر ظہیر شاہ اور ملزمان کے وکلا موجود تھے۔ چاروں کارکنان نے عدالت میں اقبالِ جرم کیا اور اپنے تحریری بیانات بھی جمع کرائے۔ ملزمان نے مؤقف اختیار کیا کہ وہ قیادت کے اکسانے پر پرتشدد احتجاج میں شامل ہوئے، لہٰذا غریب مزدور ہونے کے ناطے ان کی سزاؤں میں نرمی کی جائے۔
🔻 پس منظر:
- مئی میں اسلام آباد ہائیکورٹ نے 26 نومبر احتجاج کے دوران گرفتار 86 کارکنان کو ضمانت پر رہا کرنے کا حکم دیا تھا۔
- اُس وقت قائم مقام چیف جسٹس سرفراز ڈوگر اور جسٹس محمد آصف نے ضمانتیں منظور کی تھیں جبکہ ضمانتی مچلکے بھی کم کیے گئے تھے۔
- فروری میں بھی اسلام آباد ہائیکورٹ نے 26 نومبر احتجاج کیس میں گرفتار 120 کارکنان کی ضمانتیں منظور کرتے ہوئے فوری رہائی کا حکم دیا تھا۔
یہ فیصلہ ایسے وقت میں سامنے آیا ہے جب اسی کیس میں پہلے متعدد کارکنان کو ریلیف مل چکا ہے، مگر چار کارکنان کو اب قید کی سزا سنائی گئی ہے۔
