کراچی کے ڈیفنس فیز 6 میں نوجوان پر تشدد کے کیس نے سوشل میڈیا پر کافی ہنگامہ کھڑا کر دیا تھا، لیکن اب اس کیس کو ختم کر دیا گیا ہے۔ عدالت کے حکم پر پولیس کی جانب سے پیش کی گئی رپورٹ کے مطابق، متاثرہ نوجوان دھیرج عرف دھن راج نے کہا ہے کہ وہ ملزمان سلمان فاروقی اور اویس ہاشمی کے خلاف کوئی کارروائی نہیں چاہتا۔
نوجوان نے سب کو حیران کر دیا
نوجوان نے اپنی تحریری رپورٹ میں کہا کہ یہ مقدمہ ایک غلط فہمی کی بنیاد پر درج کیا گیا تھا۔ اس نے یہ بھی بیان دیا کہ سلمان فاروقی نے اس کے ساتھ کوئی بدتمیزی نہیں کی تھی۔ اس کے بعد اس نے باقاعدہ حلف نامہ جمع کرایا کہ وہ اس کیس کو آگے نہیں بڑھانا چاہتا۔
اس بیان کے بعد پولیس نے بھی جان سے مارنے کی دھمکی اور دیگر الزامات کو ختم کر دیا۔ اس پولیس رپورٹ کی بنیاد پر، عدالت نے فوری طور پر ملزمان کے خلاف مقدمہ ختم کرنے کا حکم دے دیا۔
کیا ہوا تھا؟
اس واقعے کی ویڈیو سوشل میڈیا پر وائرل ہو گئی تھی، جس میں دیکھا جا سکتا تھا کہ ایک کار سوار سلمان فاروقی موٹر سائیکل سوار نوجوان سدھیر پر اس کی بہن کے سامنے تشدد کر رہا ہے۔ ویڈیو میں ملزم کو گالیاں دیتے اور دھمکیاں دیتے ہوئے دیکھا جا سکتا ہے، جب کہ نوجوان کی بہن ملزم کے سامنے ہاتھ جوڑتی رہی۔ ملزم نے خواتین کو بھی دھکے دیے اور نوجوان کو جان سے مارنے کی دھمکیاں دیں اور اسے سب کے سامنے بے عزت کیا۔ بعد میں، متاثرہ نوجوان نے عدالت میں سلمان فاروقی کو معاف کر دیا تھا اور کہا تھا کہ اسے عدالت کے کسی بھی فیصلے پر کوئی اعتراض نہیں ہو گا۔ عدالت نے جب اس سے پوچھا کہ کیا وہ کسی دباؤ میں تو نہیں ہے، تو اس نے صاف انکار کرتے ہوئے کہا کہ وہ کوئی کیس نہیں کرنا چاہتا اور اس نے ملزم کو معاف کر دیا ہے۔
