وفاقی دارالحکومت میں بین الاقوامی معیار کی تفریحی سہولیات کی فراہمی کے لیے اسلام آباد تھیم پارک کے قیام کا تاریخی معاہدہ طے پا گیا ہے۔ پاکستان اور سعودی عرب کے درمیان ہونے والے اس اہم معاہدے کے تحت سعودی عرب کے ممتاز سرمایہ کار اسلام آباد میں اپنی نوعیت کے اس پہلے اور منفرد پراجیکٹ میں بھاری سرمایہ کاری کریں گے ، جبکہ کیپیٹل ڈویلپمنٹ اتھارٹی سی ڈی اے اس عظیم الشان منصوبے کے لیے اراضی فراہم کرے گی۔اس تاریخی مفاہمتی یادداشت ایم او یو پر دستخط کی پروقار تقریب قذافی سٹیڈیم لاہور میں منعقد کی گئی جس میں اعلیٰ حکام اور کاروباری شخصیات نے شرکت کی۔ تقریب کے دوران سعودی پاکستان بزنس کونسل کے چیئرمین شہزادہ منصور بن محمد السعود اور چیئرمین سی ڈی اے سہیل اشرف نے معاہدے پر دستخط کیے ، جبکہ وفاقی وزیر داخلہ محسن نقوی نے تقریب میں بطور مہمان خصوصی شرکت کی اور منصوبے کی مکمل سرپرستی کا یقین دلایا۔وفاقی وزیر داخلہ محسن نقوی نے اس موقع پر گفتگو کرتے ہوئے کہا کہ اسلام آباد تھیم پارک کا قیام دارالحکومت کی سياحتی اور اقتصادی سرگرمیوں میں ایک انقلابی پیش رفت اور گیم چینجر پراجیکٹ ثابت ہوگا۔ انہوں نے واضح کیا کہ حکومت پاکستان سعودی سرمایہ کاروں کو ہر ممکن سہولت اور تحفظ فراہم کرے گی تاکہ اس منصوبے کو مقررہ مدت میں مکمل کیا جا سکے۔ ان کا کہنا تھا کہ اس پراجیکٹ سے پاکستان میں غیر ملکی سرمایہ کاری کا اعتماد مزید بحال ہوگا۔ذرائع کے مطابق اس جدید تفریحی پارک میں عالمی معیار کے جھولے ، واٹر پارکس ، اور خاندانی تفریح کے لیے مختلف زونز قائم کیے جائیں گے جو نہ صرف مقامی شہریوں بلکہ بیرون ملک سے آنے والے سیاحوں کی توجہ کا مرکز بنیں گے۔ کیپیٹل ڈویلپمنٹ اتھارٹی نے اس منصوبے کے لیے اسلام آباد کے بہترین اور رسائی کے حامل علاقے میں زمین مختص کرنے کی تائید کی ہے تاکہ شہریوں کو باآسانی تفریحی سہولیات میسر آ سکیں۔معاشی ماہرین کا ماننا ہے کہ اسلام آباد تھیم پارک جیسے منصوبے سے نہ صرف ملک میں سیاحت کو فروغ ملے گا بلکہ ہزاروں نئے روزگار کے مواقع بھی پیدا ہوں گے۔ سعودی پاکستان بزنس کونسل کے چیئرمین نے بھی پاکستان میں سرمایہ کاری کے ماحول کو سازگار قرار دیتے ہوئے مستقبل میں مزید مشترکہ منصوبوں کے آغاز کے عزم کا اعادہ کیا ، جس سے دونوں برادر ممالک کے معاشی روابط کو نئی بلندی ملے گی۔واضح رہے کہ پاکستان اور سعودی عرب کے درمیان حالیہ مہینوں میں معاشی اور تجارتی تعاون میں ڈرامائی اضافہ دیکھا گیا ہے۔ اس سے قبل بھی دونوں ممالک کے درمیان مختلف شعبوں میں اربوں ڈالر کے معاہدے طے پائے ہیں ، اور اسلام آباد تھیم پارک کا پراجیکٹ اسی سلسلے کی ایک اہم کڑی ہے جو دونوں برادر اسلامی ممالک کے دوستانہ تعلقات کو مزید مضبوط بنائے گا۔
