سکھر: ہاری کمیٹی سٹی سکھر کے نومنتخب صدر امتیاز علی جتوئی نے اپنے عہدے پر نامزد کیے جانے پر پاکستان پیپلز پارٹی کی اعلیٰ قیادت کا شکریہ ادا کیا۔ انہوں نے کہا کہ یہ ایک اہم ذمہ داری ہے جس پر وہ اپنی تمام تر صلاحیتیں بروئے کار لائیں گے۔
امتیاز علی جتوئی نے اپنی رہائش گاہ پر میڈیا سے گفتگو کرتے ہوئے کہا کہ پارٹی قیادت نے مجھ پر اعتماد کرتے ہوئے یہ عہدہ سونپا ہے، جس کے لیے میں تہہ دل سے شکر گزار ہوں۔ انہوں نے یقین دلایا کہ وہ ہاریوں، مزدوروں اور عام شہریوں کی خدمت کریں گے اور عوامی مسائل کے حل کے لیے اپنی کوششیں جاری رکھیں گے۔
انہوں نے مزید کہا کہ جو لوگ سندھ کو تقسیم کرنے کا خواب دیکھتے ہیں، وہ جان لیں کہ یہ خواب کبھی حقیقت نہیں بنے گا۔ اس موقع پر ہاری کمیٹی سٹی سکھر کے نائب صدر سرفراز میرانی، سپاف سکھر سٹی کے وائس پریزیڈنٹ وسیم مراد، یوتھ ڈپٹی انفارمیشن سیکریٹری سکھر سٹی عامر شاہ اور دیگر کارکنان بھی موجود تھے۔
امتیاز علی جتوئی نے پارٹی کے عوامی منشور کو مدنظر رکھتے ہوئے عوامی خدمت کے عزم کا اعادہ کیا اور کہا کہ وہ اپنی ذمہ داریوں کو پورا کرنے کے لیے ہر ممکن کوشش کریں گے۔ ان کا کہنا تھا کہ عوامی مسائل کو حل کرنا ان کی اولین ترجیح ہوگی۔
