پنجاب کے مختلف علاقوں میں شدید دھند کے باعث اہم موٹرویز کو ٹریفک کے لیے بند کر دیا گیا ہے۔ ترجمان موٹروے پولیس کے مطابق یہ اقدام عوام کی جان و مال کے تحفظ کے پیشِ نظر اٹھایا گیا ہے۔موٹروے پولیس کے مطابق موٹروے ایم ٹو لاہور سے کوٹ مومن تک دھند کی وجہ سے بند ہے، جبکہ موٹروے ایم تھری لاہور سے درخانہ تک ٹریفک کے لیے بند کر دی گئی ہے۔ اس کے علاوہ لاہور۔سیالکوٹ موٹروے ایم الیون بھی شدید دھند کے باعث بند ہے۔ترجمان کے مطابق موٹروے ایم فور پنڈی بھٹیاں سے عبدالحکیم تک اور موٹروے ایم فائیو ملتان سے روہڑی تک دھند کی وجہ سے بند کر دی گئی ہیں۔قومی شاہراہ پر سندر، مانگا منڈی، پھول نگر، پتوکی، اوکاڑہ، گیمبر، ساہیوال، چیچہ وطنی اور اقبال نگر میں دھند کی شدت برقرار ہے، جہاں حدِ نگاہ صفر سے 100 میٹر تک محدود ہو چکی ہے۔موٹروے پولیس نے شہریوں کو ہدایت کی ہے کہ دھند میں لین ڈسپلن کی خلاف ورزی خطرناک حادثات کا باعث بن سکتی ہے۔ ترجمان کے مطابق دھند میں صبح 10 بجے سے شام 6 بجے تک کے اوقات محفوظ سمجھے جاتے ہیں۔شہریوں کو ہدایت کی گئی ہے کہ گاڑیوں پر فوگ لائٹس کا استعمال لازمی کریں، غیر ضروری سفر اور تیز رفتاری سے گریز کریں اور اگلی گاڑی سے محفوظ فاصلہ برقرار رکھیں۔ کسی بھی رہنمائی یا مدد کے لیے موٹروے پولیس ہیلپ لائن 130 پر رابطہ کیا جا سکتا ہے۔
