مدینہ منورہ نے پائیدار ترقی کے میدان میں عالمی سطح پر ایک اور اعزاز حاصل کیا اور شنگھائی گلوبل ایوارڈ برائے پائیدار ترقی کے تیسرے ایڈیشن میں کامیابی حاصل کی۔ سعودی پریس ایجنسی کے مطابق یہ ایوارڈ مدینہ کی شہری اختراع، پائیداری اور معیارِ زندگی کو بہتر بنانے میں نمایاں کارکردگی کا اعتراف ہےایوارڈ اس بات کی علامت ہے کہ مدینہ منورہ نے شہری ترقی کے لیے ایک متوازن اور جامع قومی ماڈل اپنایا ہے، جس میں شہریوں کی ضروریات اور معیارِ زندگی کو سب سے زیادہ اہمیت دی گئی ہے۔ یہ ماڈل ڈیجیٹل ٹیکنالوجی کے استعمال، ماحول کے تحفظ اور پائیدار ترقی پر مبنی ہےمدینہ منورہ کے میئر فہد بن محمد البلیہشی کا کہنا ہے کہ شہر نے پائیدار ترقی کے اہداف کو مقامی سطح پر عملی شکل دینے میں دنیا کے لیے ایک مثال قائم کی ہے۔ شہری سہولت کے لیے اٹھائے گئے اقدامات میں اربن ڈیٹا پلیٹ فارم ’’منارا‘‘، پبلک ٹرانسپورٹ سسٹم ’’مدینہ بسیز‘‘ اور وادی العقیق ماحولیاتی بحالی منصوبہ قابلِ ذکر ہیںواضح رہے کہ شنگھائی گلوبل ایوارڈ میں پائیدار ترقی کے اہداف میں نمایاں کارکردگی دکھانے والے شہروں کو اعزاز دیا جاتا ہے۔ تیسرے ایڈیشن میں 33 ممالک کے 58 شہروں نے شرکت کی، اور نتائج کا اعلان کولمبیا کے دارالحکومت بوگوٹا میں منعقدہ تقریب میں کیا گیا۔
