امریکی الیکٹرک کار کمپنی ٹیسلا کے مالک ایلون مسک ایک بار پھر دنیا کے امیر ترین شخص بن گئے۔فوربز کی تازہ فہرست کے مطابق، ایلون مسک 457 ارب ڈالرز کے اثاثوں کے ساتھ پہلے نمبر پر ہیں، جبکہ اکتوبر میں ان کی دولت میں 6 ارب ڈالرز کا اضافہ ہوا۔فہرست میں لیری ایلیسن دوسرے، جیف بیزوس تیسرے، لیری پیج چوتھے، اور مارک زکربرگ پانچویں نمبر پر ہیں۔ دنیا کے دس امیر ترین افراد میں سے نو امریکی شہری ہیں، جن کی مجموعی دولت 2.4 ٹریلین ڈالرز تک پہنچ چکی ہے۔ایلون مسک ٹیسلا کے 12.4 فیصد حصص کے مالک ہیں، اور ان کی بیشتر دولت اسی کمپنی سے وابستہ ہے۔ اس سال اب تک ٹیسلا کے حصص میں 14 فیصد اضافہ ہوا، جب کہ یکم اکتوبر کو صرف ایک دن میں 3 فیصد اضافہ دیکھا گیا جس سے مسک کی دولت میں 6 ارب ڈالرز کا اضافہ ہوا۔چند ماہ قبل ان کے اثاثوں میں کمی دیکھی جا رہی تھی، تاہم صدر ٹرمپ سے فاصلہ اختیار کرنے اور اپنی کمپنیوں پر دوبارہ توجہ دینے کے بعد ان کی دولت میں نمایاں اضافہ ہوا۔حال ہی میں انہوں نے ٹیسلا کے ایک ارب ڈالرز مالیت کے حصص خرید کر سرمایہ کاروں کا اعتماد بھی بحال کیا۔اسپیس ایکس اور ایکس اے آئی جیسی کمپنیوں کی قدر میں بھی اضافہ ہوا ہے، اسپیس ایکس کی مالیت تقریباً 400 ارب ڈالرز تک پہنچ چکی ہے، جبکہ جولائی 2025 میں ایکس اے آئی کی قدر 75 ارب ڈالرز رہی۔
