شہرِ قائد کے علاقے بوٹ بیسن پولیس نے کارروائی کرتے ہوئے جعلی میجر بن کر شارٹ ٹرم اغواء کی وارداتوں میں ملوث دو ملزمان کو گرفتار کرلیا۔ پولیس کے مطابق گرفتار ملزمان کی شناخت طلال افسر عرف میجر ظفر اور امام بخش کے نام سے ہوئی ہے، جن کے قبضے سے دو 30 بور پستول، گاڑی، چار وائرلیس سیٹ، چار موبائل فون اور تین بلٹ پروف جیکٹس برآمد ہوئیں۔ ابتدائی تفتیش میں ملزمان نے متعدد وارداتوں سمیت مدعی تاج الدین سے دو اقساط میں 80 لاکھ روپے تاوان وصول کرنے کا اعتراف کیا۔ پولیس کے مطابق ملزمان کے خلاف تاوان کا مقدمہ تھانہ ٹیپو سلطان میں درج ہے جبکہ طلال افسر عرف میجر ظفر پہلے ہی اشتہاری قرار دیا جاچکا ہے۔ جعلی میجر کے خلاف تھانہ سپر مارکیٹ اور گلشن اقبال میں بھی مقدمات درج ہیں۔ ایس ایس پی ساؤتھ کے مطابق گرفتار ملزمان کے خلاف مزید مقدمات قائم کیے گئے ہیں اور ان کے دیگر ساتھیوں کی گرفتاری کے لیے چھاپے مارے جارہے ہیں۔ پولیس کا کہنا ہے کہ یہ ایک منظم جرائم پیشہ گروہ ہے اور تفتیش میں مزید اہم انکشافات متوقع ہیں۔
