اسلام آباد: ٹریفک پولیس نے سرکاری ملازمین کے لیے ڈرائیونگ لائسنس کے حصول کی خصوصی مہم شروع کر دی ہے، جس سے لائسنس بنوانے کے خواہشمند ملازمین کی بڑی مشکل آسان ہو گئی۔تفصیلات کے مطابق اسلام آباد ٹریفک پولیس کی جانب سے یہ مہم 17 ستمبر سے 26 ستمبر تک جاری رہے گی۔ اس دوران سرکاری ملازمین کو ٹریفک دفاتر اور موبائل وینز پر تمام سہولیات فراہم کی جائیں گی تاکہ وہ آسانی کے ساتھ ڈرائیونگ لائسنس حاصل کر سکیں۔ترجمان پولیس کے مطابق مہم کا مقصد سرکاری ملازمین میں قانون کی پاسداری کو یقینی بنانا ہے۔سی ٹی او اسلام آباد کیپٹن (ر) حمزہ ہمایوں نے کہا کہ بڑی تعداد میں سرکاری ملازمین کے پاس ڈرائیونگ لائسنس موجود نہیں، جبکہ بطور سرکاری ملازم احتساب کا آغاز سب سے پہلے خود سے ہونا چاہیے۔انہوں نے خبردار کیا کہ 26 ستمبر کے بعد بغیر لائسنس ڈرائیونگ کرنے والوں کے خلاف بلا تفریق سخت کارروائی کی جائے گی۔
