پاکپتن میں کرائم کنٹرول ڈیپارٹمنٹ (سی سی ڈی) نے ڈاکوؤں کے خلاف ایک بڑی کارروائی کی ہے۔ ترکھنی روڈ پر ڈاکوؤں نے ناکہ لگا رکھا تھا اور پولیس کو دیکھ کر فائرنگ شروع کردی۔ جوابی کارروائی میں چار ڈاکو ہلاک ہوگئے۔ اس دوران ایک پولیس اہلکار بھی زخمی ہوا، جسے فوری طور پر ہسپتال منتقل کر دیا گیا۔ ترجمان سی سی ڈی کے مطابق، مارے گئے ڈاکوؤں سے جدید اسلحہ اور گولیاں برآمد کی گئی ہیں۔ فائرنگ کے تبادلے میں پولیس کی گاڑی کو بھی نقصان پہنچا۔ کراچی میں کار چوروں کا بڑا گروہ گرفتار دوسری جانب، کراچی کے اورنگی ٹاؤن میں بھی پولیس نے ایک اہم کامیابی حاصل کی ہے۔ اینٹی وہیکل لفٹنگ سیل (اے وی ایل سی) نے فائرنگ کے تبادلے کے بعد کار چوروں کے ایک بڑے گروہ کے تین ارکان کو گرفتار کر لیا ہے۔ گرفتار ملزمان کی شناخت امان اللہ، ندیم، اور نادر علی کے نام سے ہوئی ہے۔ پولیس کے مطابق، ملزم امان اللہ 2011 سے جرائم کی دنیا میں سرگرم تھا۔ ان کے قبضے سے دو پستول، ایک چوری شدہ کار، تالے توڑنے والی راڈ اور مختلف چابیاں برآمد کی گئی ہیں۔ اس گروہ کا تعلق ایک بڑے اور منظم کار چور گینگ سے تھا جو چوری کی گئی گاڑیاں بلوچستان کے ایک رہائشی “حاجی” کو فروخت کرتے تھے۔ پولیس نے ان کے دو مفرور ساتھیوں، عمران اور زکریا، کی تلاش میں چھاپے مار رہی ہے۔ ان ملزمان کے خلاف اقبال مارکیٹ تھانے میں مقدمات درج کر لیے گئے ہیں۔
