تفصیلات کے مطابق نئے کرنسی نوٹوں کے اجرا سے متعلق اسٹیٹ بینک نے وضاحت جاری کرتے ہوئے کہا ہے کہ نئے بینک نوٹ جاری نہ کیے جانے سے متعلق خبروں کی سختی سے تردید کرتے ہیں۔ اسٹیٹ بینک نے کہا ہے کہ عید الفطر 2025 کے موقع پر بھی کمرشل بینکوں کی نئے بینک نوٹ جاری کرنے کی اپنی دیرینہ سالانہ روایت جاری رہے گی، ہم بینکوں کے ملک گیر برانچ نیٹ ورک کے ذریعے عوام تک نئے نوٹوں تک رسائی کو آسان بنانے کے لیے کوشاں ہیں۔ اسٹیٹ بینک رواں سال ماہِ رمضان کے دوران کمرشل بینکوں کی 17 ہزار برانچوں کو تمام مالیتوں میں 27 ارب روپے کے نئے بینک نوٹ فراہم کرچکا ہے، اس بات کو یقینی بنانے کے لیے بھی انتظامات کیے گئے ہیں کہ نئے کرنسی نوٹ عوام الناس تک پہنچ سکیں۔ بینکوں کا اے ٹی ایم نیٹ ورک مذہبی تہوار کے موقع پر عوام کو بلا تعطل معیاری اور صاف ستھرے بینک نوٹ جاری کریں گے، نئے بینک نوٹوں کی تقسیم اور تمام کمرشل بینک برانچوں میں دستیابی کو یقینی بنانے کے لیے اسٹیٹ بینک نے کیش مانیٹرنگ ٹیمیں بھی تعینات کر دی ہیں۔ اسٹیٹ بینک آف پاکستان کا کہنا ہے کہ ان اقدامات کا مقصد عوام کو نئے بینک نوٹوں کی بہ آسانی فراہمی یقینی بنانا ہے۔
11
