ماسکو:روسی صدارتی محل کریملن نے سائبیریا کے خطے میں طاعون (طاعونی وبا) پھوٹ پڑنے کی اطلاعات کو یکسر مسترد کرتے ہوئے بے بنیاد اور من گھڑت قرار دے دیا ہے۔ کریملن کے ترجمان دمتری پیسکوف نے پریس بریفنگ کے دوران وضاحت کی کہ گردش کرنے والی ان خبروں میں کوئی صداقت نہیں ہے اور حقیقت سے ان کا دور دور تک کوئی واسطہ نہیں۔
ترجمان نے کہا کہ روسی حکومت اور محکمہ صحت خطے کی صورتحال کی مسلسل نگرانی کر رہے ہیں، اور اس وقت صحت عامہ کے حوالے سے کسی قسم کا کوئی خطرہ موجود نہیں ہے۔ انہوں نے عوام کو اطمینان دلایا کہ ملک کا شعبہ صحت ہر قسم کی صورتحال سے نمٹنے کے لیے مکمل طور پر فعال ہے اور تمام ضروری احتیاطی اقدامات نافذ ہیں۔
دمتری پیسکوف نے ان افواہوں کی سخت مذمت کرتے ہوئے شہریوں کو تاکید کی کہ وہ سوشل میڈیا یا غیر مصدقہ ذرائع سے پھیلائی جانے والی بے بنیاد افواہوں پر کان نہ دھریں۔ ان کا مزید کہنا تھا کہ سائبیریا میں صحت عامہ کی مجموعی صورتحال مکمل طور پر قابو میں ہے اور پریشانی کی قطعی کوئی بات نہیں۔
