سعودی عرب کے لیے قومی فضائی کمپنی پاکستان انٹرنیشنل ایئرلائنز کا فلائٹ آپریشن بری طرح متاثر ہوگیا۔ میڈیا رپورٹس میں ایئرلائن ذرائع سے پتا چلا ہے کہ کراچی سے جدہ جانے والی پرواز پی کے 859 کئی گھنٹے تاخیر کا شکار ہے، پرواز کو صبح ساڑھے 8 بجے روانہ ہونا تھا لیکن طیارہ دستیاب نہ ہونے کی وجہ سے مذکورہ پرواز اپنی منزل کی جانب روانہ نہیں ہوسکی، جس کی وجہ سے مسافروں کو مشکلات کا سامنا کرنا پڑ رہا ہے، پرواز پی کے 859 کی شام 4 بج کر 45 منٹ پر روانگی کا امکان ہے ذرائع سے معلوم ہوا ہے کہ جدہ سے کراچی آنے والی پرواز پی کے 742 تقریباً 5 گھنٹے سے زائد کی تاخیر کا شکار ہے، اسی طرح اسلام آباد سے کراچی آنے والی پرواز پی کے 301 کے آنے میں بھی 3 گھنٹے سے زائد کی تاخیر ہوئی، پی آئی اے کے طیارے پی کے 301 کو صبح 11 بج کر 55 منٹ پر کراچی پہنچنا تھا، پی کے 742 کو ساڑھے 11 بجے جدہ سے کراچی آنا تھا، جس کی 3 بج کر 45 منٹ پر آمد متوقع ہے ذرائع کی جانب سے بتایا جارہا ہے کہ پی آئی اے کے 5 بوئنگ 777 طیارے گراؤنڈ ہونے کے باعث فلائٹ آپریشن متاثر ہے، پروازوں میں تاخیر کے باعث مسافروں نے احتجاج کیا، اس دوران مسافروں کی ایئر پورٹ پر عملے سے تلخ کلامی بھی ہوئی۔ گزشتہ روز سعودی عرب کے ساحلی شہر جدہ میں پاکستان انٹرنیشنل ایئرلائنز کے طیارے میں آگ لگنے کے واقعے کے بعد تمام مسافروں کو ہوٹل منتقل کیا گیا جہاں ایک مسافر دل کا دورہ پڑنے سے خالق حقیقی سے جا ملا بتایا گیا ہے کہ جدہ سے لاہور کی پرواز پی کے 760 کی پاکستان روانگی کے وقت اس کے اے پی یونٹ میں آگ لگنے کا واقعہ پیش آیا، جس کے بعد پرواز کی روانگی منسوخ کرتے ہوئے 275 مسافروں کو ہوٹل منتقل کردیا گیا، جہاں گوجرانوالہ کا رہائشی 31 سالہ نوجوان ذکیس احمد بھی دیگر مسافروں کے ہمراہ ہوٹل میں مقیم تھا کہ اچانک اسے دل کا دورہ پڑا جو جان لیوا ثابت ہوا۔
