اسلام آباد: راولپنڈی کی اڈیالہ جیل میں قید بانی پی ٹی آئی عمران خان کو آنے والے دنوں میں جامع طبی معائنے اور علاج کی غرض سے اسلام آباد کے نجی اسپتال منتقل کیے جانے کا قوی امکان ظاہر کیا جا رہا ہے۔ ذرائع کا کہنا ہے کہ انتظامیہ اور سیکیورٹی اداروں نے اس سلسلے میں ابتدائی تیاریوں کا آغاز کر دیا ہے۔
ذرائع کے مطابق بانی پی ٹی آئی کی صحت سے متعلق درپیش خدشات اور ان کے معالجین کی سفارشات کو مدنظر رکھتے ہوئے یہ ممکنہ فیصلہ کیا جا رہا ہے۔ گزشتہ چند دنوں کے دوران وکلائے صفائی اور پارٹی رہنماؤں کی جانب سے بھی مسلسل یہ مطالبہ سامنے آ رہا تھا کہ انہیں معیاری اور اعلیٰ طبی سہولیات فراہم کی جائیں۔
ذرائع کا مزید بتانا ہے کہ اسپتال منتقلی کے عمل کو انتہائی خفیہ اور محفوظ رکھنے کے لیے سیکیورٹی کا خاص پلان تیار کیا جا رہا ہے۔ متعلقہ حکام کی جانب سے اسلام آباد کے دو معروف نجی اسپتالوں کا جائزہ لیا گیا ہے ، جہاں تمام ضروری طبی سہولیات کے ساتھ ساتھ سخت سیکیورٹی فراہم کی جا سکتی ہے۔
ترجمان اور قانونی ٹیم کے مطابق بانی پی ٹی آئی کو علاج کے لیے منتقل کرنے سے قبل جیل کے سرکاری معالجین اور ان کے ذاتی ڈاکٹروں کے درمیان مشاورت مکمل کی جائے گی۔ طبی رپورٹ مرتب ہونے کے بعد ہی حتمی منظوری دی جائے گی تاکہ کسی بھی غیر معمولی صورتحال سے نمٹا جا سکے۔
دوسری جانب پاکستان تحریک انصاف کے کارکنان اور مرکزی قیادت نے مطالبہ کیا ہے کہ حکومت اس معاملے میں کسی قسم کی تاخیر سے کام نہ لے اور بانی پی ٹی آئی کے بنیادی قانونی اور انسانی حقوق کا خیال رکھتے ہوئے انہیں فوری طور پر بہترین اسپتال منتقل کرے۔
واضح رہے کہ اس سے قبل بھی اڈیالہ جیل میں طبی ٹیمیں بانی پی ٹی آئی کا معائنہ کر چکی ہیں ، تاہم خصوصی معائنہ اور ٹیسٹ جیل کی حدود میں ممکن نہ ہونے کی وجہ سے انہیں نجی اسپتال لانے کی ضرورت پیش آ رہی ہے۔ انتظامی ذرائع کے مطابق آئندہ چوبیس سے چالیس گھنٹوں کے اندر اس حوالے سے حتمی پیش رفت کی توقع ہے۔
