کابینہ کی اقتصادی رابطہ کمیٹی نے سستے گھروں کی تعمیر کیلئے اسکیم کی منظوری دے دی جب کہ مارک اَپ سبسڈی رسک شیئرنگ اسکیم کے تحت مالی معاونت کا فیصلہ بھی کیا گیا ہے۔ کابینہ کی اقتصادی رابطہ کمیٹی (ای سی سی) کا اجلاس جمعہ کو وزارت خزانہ میں وزیر خزانہ محمد اورنگزیب کی زیر صدارت منعقد ہوا۔ اجلاس میں ای سی سی نے گھی، کوکنگ آئل کی قیمتوں میں اضافے کا نوٹس لیتے ہوئے عالمی قیمتوں میں کمی کے باوجود عوام کو پورا ریلیف نہ ملنے پر اظہار تشویش کیا۔ ای سی سی اجلاس میں وزارت صنعت کی جانب سے گھی، کوکنگ آئل کی دستیابی اور قیمتوں پر بریفنگ دی گئی جس پرکمیٹی نے قیمتوں میں اضافے اور کارٹلائزیشن کی روک تھام کی ہدایت کی جبکہ مسابقتی کمیشن، نیشنل پرائس کمیٹی، صوبائی حکومتوں کے درمیان روابط پر زور دیا گیا۔ ای سی سی کا کہنا تھا کہ وزارت صنعت اس حوالے سے اسٹیک ہولڈرز سے کوآرڈی نیشن کرے۔ اجلاس میں ای سی سی نے سستے گھروں کی تعمیر کیلئے اسکیم کی منظوری دے دی جبکہ مارک اپ سبسڈی رسک شیئرنگ اسکیم کے تحت مالی معاونت کا فیصلہ بھی کیا گیا۔ ذرائع کے مطابق حکومت 50 ہزار گھروں کی تعمیر کیلئے سبسڈی فراہم کرے گی، 20 سے 35 لاکھ تک کا قرضہ 20 سال کی مدت کیلئے دینے کی تجویز دی گئی ہے۔ اجلاس میں طے کیا گیا کہ ملک میں لوکاسٹ ہاؤسنگ کو فروغ دیا جائے گا۔ وزارت ہاؤسنگ کو اس شعبے کا جامع ڈیٹا بیس تیار کرنے کی ہدایت کر دی گئی اس مقصد کیلئے وفاقی اور صوبائی اسٹیک ہولڈرز سے مشاورت کی ہدایت کی گئی ہے۔ اقتصادی رابطہ کمیٹی کے اجلاس میں شپ بریکنگ ری سائیکلنگ کو باقاعدہ صنعت کا درجہ دینے، پاکستان اسکل امپیکٹ بانڈ کے اجراء کیلئے ایک ارب روپے کی گارنٹی کی منظوری دی گئی۔ اس کے تحت ملک میں اسکل ڈیویلپمنٹ کی حوصلہ افزائی کی جائے گی۔ اجلاس میں نیشنل ٹیرف پالیسی 30-2025ء کے تحت اسٹیل سیکٹر کے فروغ کا فیصلہ کیا گیا۔ وزارت خزانہ کا کہنا تھا کہ اسٹیل کے شعبے کو برآمدات کی بنیاد پر ترقی دی جائے گی ای سی سی نے ریڈیو بیسڈ سروسز کے چارجز پر نظرثانی کی منظوری دیدی ہے جبکہ نجی کمپنی کو گیس ٹیرف میں رعایت کے خلاف عدالت عظمیٰ سے رجوع کا فیصلہ کیا گیا۔
