وزیراعلیٰ پنجاب مریم نواز نے واہگہ بارڈر پر تعمیر کیے گئے جدید اور توسیع شدہ ارینا کا باضابطہ افتتاح کر دیا، جہاں شائقین کے لیے نشستوں کی تعداد ساڑھے سات ہزار سے بڑھا کر پچیس ہزار کر دی گئی ہے
واہگہ بارڈر پر پاکستان رینجرز کے زیرِ اہتمام جوائنٹ چیک پوسٹ پر منعقدہ افتتاحی تقریب میں وزیراعلیٰ پنجاب مریم نواز نے بطور مہمانِ خصوصی شرکت کی۔ اس موقع پر سینئر وزیر مریم اورنگزیب، کور کمانڈر لاہور، صوبائی وزراء، سینئر بیوروکریسی اور دیگر اعلیٰ حکام بھی موجود تھے۔ارینا کی توسیع کے ساتھ جوائنٹ چیک پوسٹ واہگہ پر متعدد نئی تعمیرات بھی کی گئی ہیں، جن میں تقسیمِ ہند کی عکاسی کے لیے ریلوے اسٹیشن کا ماڈل، سامانِ حرب یادگارِ شہداء شامل ہیں۔ اس کے علاوہ تحریکِ آزادی سے لے کر آج تک پاکستان کی تاریخ اور ثقافت کو اجاگر کرنے کے لیے ایک جامع پاکستان میوزیم بھی قائم کیا گیا ہے۔نئی سہولیات میں اضافی دفاتر، پنجاب رینجرز کے جوانوں کے لیے بیرکس، نمازیوں کے لیے علیحدہ پریئر ایریا، فوڈ کورٹس اور وسیع کار پارکنگ شامل ہیں۔ بابِ آزادی پر شاہی قلعہ کے طرز پر عالمگیری دروازہ بھی نصب کیا گیا ہے۔افتتاحی تقریب کے دوران جوائنٹ چیک پوسٹ واہگہ پر نصب قومی پرچم کی اونچائی 115 میٹر سے بڑھا کر 139 میٹر کر دی گئی، جو ایشیا کا ساتواں جبکہ جنوبی ایشیا کا بلند ترین قومی پرچم قرار دیا جا رہا ہے۔ تقریب کے موقع پر سیکیورٹی کے سخت انتظامات کیے گئے تھے
