24 نومبر: خیبرپختونخوا سے اسلام آباد تک احتجاج کی تیاریاں عروج پر
خیبر پختونخوا حکومت کے ترجمان بیرسٹر سیف نے پشاور میں میڈیا سے گفتگو کرتے ہوئے خبردار کیا کہ وفاقی اور پنجاب حکومت رکاوٹیں کھڑی کرنے کی غلطی نہ کرے۔ ان کا کہنا تھا کہ 24 نومبر کے احتجاج کے لیے ہر رکاوٹ ہٹانے کا مکمل انتظام کر لیا گیا ہے۔
“کنٹینرز عوام کے جذبے کے سامنے بے معنی”
بیرسٹر سیف نے کہا، “پہلے بھی رکاوٹیں عبور کر کے اسلام آباد پہنچے تھے، اور اس بار بھی پہنچیں گے۔ کنٹینرز عوام کے جوش و جذبے کے سامنے ریت کی دیوار ثابت ہوں گے۔”
انہوں نے مزید اعلان کیا کہ خیبرپختونخوا کا قافلہ وزیراعلیٰ علی امین گنڈاپور کی قیادت میں اسلام آباد پہنچے گا اور مطالبات کی منظوری تک واپسی ممکن نہیں ہوگی۔
عمران خان کی احتجاج کی کال
اڈیالہ جیل میں قید سابق وزیراعظم عمران خان نے 24 نومبر کو ملک گیر احتجاج کی کال دی ہے۔ پارٹی قیادت نے سندھ اور بلوچستان میں مقامی سطح پر احتجاج کے ساتھ ساتھ اسلام آباد پہنچنے کی بھی ہدایت کی ہے۔
پی ٹی آئی نے عوام سے اپیل کی ہے کہ وہ اس احتجاج میں بھرپور شرکت کریں اور حکومت پر دباؤ ڈالنے میں اپنا کردار ادا کریں۔
