صوبائی وزیرِ صحت اور آبادی خواجہ عمران نذیر کی صدارت میں داخلہ محکمہ میں ایک اجلاس منعقد ہوا، جس میں جیل اسپتالوں کی بہتری اور قیدیوں کے لیے طبی سہولیات کا تفصیلی جائزہ لیا گیا۔وزیر صحت نے ہدایت کی کہ تمام ضلعی اسپتالوں میں خاص جیل کاؤنٹرز قائم کیے جائیں تاکہ قیدیوں کو فوری اور مناسب طبی سہولیات فراہم کی جا سکیں۔اجلاس میں فیصلہ کیا گیا کہ پنجاب کی 44 جیل اسپتالوں میں ایمبولینسز کے لیے ریسکیو سہولیات فراہم کی جائیں، جبکہ متعلقہ ڈی ایچ کیو اسپتال کا میڈیکل سپرنٹنڈنٹ جیل اسپتال کا انچارج ہوگا تاکہ نگرانی اور انتظام بہتر ہو۔خواجہ عمران نذیر نے فنڈز کی منصفانہ تقسیم اور جیل اسپتالوں کی کیٹیگرائزیشن پر بھی زور دیا تاکہ تمام علاقوں میں یکساں وسائل دستیاب ہوں۔اجلاس میں سیکریٹری داخلہ پنجاب نے بتایا کہ جیل میں آنے والے نئے قیدیوں کے لیے ایچ آئی وی، ہیپاٹائٹس اور ٹی بی کے ٹیسٹ لازمی کیے جائیں گے تاکہ قیدیوں کی صحت کا مکمل جائزہ لیا جا سکے۔اجلاس کا مقصد جیل اسپتالوں کے نظام کو مضبوط کرنا، قیدیوں کو معیاری طبی سہولیات فراہم کرنا اور ہنگامی حالات میں فوری رسپانس یقینی بنانا تھا۔ آخر میں وزیر صحت نے ہدایت کی کہ تمام فیصلے جلد عملی جامہ پہنائیں جائیں اور ہر جیل اسپتال کی صورتحال کا باقاعدہ جائزہ لیا جائے۔
