پاکستان پیپلز پارٹی کے 58ویں یومِ تاسیس پر اپنے خصوصی پیغام میں صدر آصف علی زرداری نے کہا ہے کہ ملک کے ایٹمی پروگرام کی بنیاد پیپلز پارٹی نے رکھی۔ اس موقع پر انہوں نے ذوالفقار علی بھٹو اور محترمہ بینظیر بھٹو شہید کو ان کی قومی خدمات پر خراجِ عقیدت بھی پیش کیا۔صدر زرداری کا کہنا تھا کہ پیپلز پارٹی نے ہمیشہ پاکستان میں جمہوریت کے استحکام کے لیے جدوجہد کی۔ آمریت کے خلاف مزاحمت اور عوامی حقوق کی بحالی پارٹی کا تاریخی کارنامہ ہے۔ انہوں نے کہا کہ 1973ء کا متفقہ آئین ذوالفقار علی بھٹو کا ایسا تحفہ ہے جس پر پوری قوم آج بھی فخر کرتی ہے۔اپنے پیغام میں انہوں نے مزید کہا کہ وفاق کے استحکام اور قومی یکجہتی میں پیپلز پارٹی ہمیشہ اہم کردار ادا کرتی رہی ہے۔ گلگت بلتستان اور آزاد کشمیر میں اصلاحات بھی پارٹی کی ہی کوششوں کا نتیجہ ہیں۔ ان کے مطابق مزدور، کسان، تعلیم اور سماجی انصاف سے متعلق اصلاحات پیپلز پارٹی کی شناخت ہیں۔
صدر زرداری نے کہا کہ ایم آر ڈی سے اے آر ڈی تک پیپلز پارٹی نے جمہوریت کے سفر میں ہمیشہ قیادت کی، جبکہ چارٹر آف ڈیموکریسی اور 18ویں ترمیم پارٹی کا تاریخی جمہوری ورثہ ہیں۔ انہوں نے اس موقع پر نشاندہی کی کہ نیشنل ایکشن پلان میں پیپلز پارٹی کی شمولیت بھی انتہائی اہمیت کی حامل رہی ہے۔انہوں نے کہا کہ پیپلز پارٹی ہمیشہ مزدوروں، ہاریوں، خواتین اور اقلیتوں کی آواز بنی ہے اور محروم طبقوں کا ساتھ دینا پارٹی کے مشن کا مرکزی حصہ ہے۔ان کے مطابق جمہوریت، مساوات اور سماجی انصاف کے عزم کی از سرِ نو تجدید وقت کی اہم ضرورت ہے۔ خواتین اور اقلیتوں کا بااختیار ہونا پاکستان کے روشن مستقبل کی ضمانت ہے۔صدر آصف علی زرداری نے کارکنوں پر زور دیا کہ وہ جمہوری اتحاد کو برقرار رکھیں، کیونکہ پیپلز پارٹی ایک روادار اور روشن خیال پاکستان کے لیے مسلسل پرعزم ہے۔
