تہران: ایرانی صدر مسعود پیزشکیان نے کہا ہے کہ ایران کسی بھی نئی پابندیوں پر قابو پانے کی صلاحیت رکھتا ہے اور کسی ناجائز دباؤ کے آگے نہیں جھکے گا۔غیر ملکی میڈیا رپورٹس کے مطابق صدر پیزشکیان نے کہا کہ “نئی پابندیوں سے راستہ روکا جاسکتا ہے لیکن ہمارے پاس بھی عقل ہے، امریکا اور اسرائیل نے نطنز اور فردو پر حملہ کیا، مگر یہ انسان ہیں جو دوبارہ تعمیر کریں گے، کوئی ہمیں نہیں روک سکتا، ہم اپنی راہ خود بنائیں گے۔”انہوں نے کہا کہ ایران ناجائز مطالبات کے سامنے کبھی ہتھیار نہیں ڈالے گا اور ہمارے پاس صورتحال بدلنے کی طاقت موجود ہے۔ “ہماری راہ روکنے کی کوشش ضرور ہوگی لیکن ہم آگے بڑھنے کی صلاحیت رکھتے ہیں۔”یاد رہے کہ حال ہی میں اقوام متحدہ کی سلامتی کونسل نے ایران پر پابندیاں مستقل طور پر ختم کرنے کی قرارداد مسترد کر دی۔ قرارداد کے حق میں صرف 4 ممالک — روس، چین، پاکستان اور الجزائر — نے ووٹ دیا، جب کہ 9 اراکین نے مخالفت کی، جس کے باعث قرارداد ناکام ہوگئی۔اس ووٹنگ کے بعد ایران پر اقتصادی پابندیاں بدستور برقرار رہیں گی۔ یہ عمل برطانیہ، فرانس اور جرمنی کی جانب سے 28 اگست کو شروع کیے گئے 30 روزہ طریقہ کار کے تحت کیا گیا، جس کا مقصد ایران پر دوبارہ اقوام متحدہ کی پابندیاں عائد کرنا تھا۔
