واشنگٹن (اے این این) — امریکی صدر ڈونلڈ ٹرمپ نے افغانستان کو سخت دھمکی دیتے ہوئے کہا ہے کہ اگر طالبان بگرام ائیر بیس امریکا کے حوالے نہیں کرتے تو اس کے سنگین اور خطرناک نتائج سامنے آئیں گے۔غیر ملکی خبر رساں ادارے کے مطابق ٹرمپ نے سماجی رابطے کی ویب سائٹ ایکس (X) پر اپنے پیغام میں کہا:
“اگر طالبان وہ بیس واپس نہیں دیتے جو امریکا نے بنایا تھا، تو بہت برا ہوگا۔ سنگین نتائج آئیں گے۔”یاد رہے کہ چند روز قبل برطانیہ کے دورہ کے دوران پریس کانفرنس میں صدر ٹرمپ نے پہلی بار یہ انکشاف کیا تھا کہ امریکا بگرام ائیر بیس دوبارہ حاصل کرنے کی کوشش کر رہا ہے۔ ان کا کہنا تھا کہ یہ بیس اس لیے اہم ہے کیونکہ یہ اس مقام سے صرف ایک گھنٹے کی مسافت پر ہے جہاں چین اپنے جوہری ہتھیار تیار کرتا ہے۔امریکی میڈیا کی رپورٹس کے مطابق واشنگٹن اور طالبان کے درمیان انسدادِ دہشت گردی کارروائیوں پر مذاکرات جاری ہیں اور بگرام ائیر بیس پر محدود تعداد میں امریکی فوجیوں کی تعیناتی پر غور کیا جا رہا ہے۔ تاہم طالبان ماضی میں کسی بھی غیر ملکی فوجی موجودگی کی سخت مخالفت کرتے رہے ہیں۔صدر ٹرمپ نے ایک بار پھر افغانستان میں چین کے بڑھتے ہوئے اثر و رسوخ پر تشویش ظاہر کرتے ہوئے کہا کہ بگرام ائیر بیس کو کھونا سابق صدر جو بائیڈن کی افغان پالیسی کی سب سے بڑی ناکامی ثابت ہوا ہے۔سیاسی و عسکری ماہرین کے مطابق بگرام کا معاملہ نہ صرف امریکا اور طالبان کے تعلقات پر اثر انداز ہوگا بلکہ اس کے خطے میں طاقت کے توازن پر بھی گہرے اثرات مرتب ہو سکتے ہیں۔
