اسرائیلی وزیر دفاع اسرائیل کاٹز نے یمن کے حوثی گروپ کے سربراہ عبدالملک الحوثی کو براہِ راست دھمکی دیتے ہوئے کہا ہے کہ “تمہاری باری بھی آئے گی۔”ترک خبر ایجنسی انادولو کے مطابق جمعے کے روز اسرائیلی وزیر دفاع نے اپنے بیان میں عبدالملک الحوثی کو قتل کرنے اور یمن کے دارالحکومت صنعا پر اسرائیل کا پرچم لہرانے کی دھمکی دی۔انہوں نے سوشل میڈیا پلیٹ فارم X پر لکھا کہ عبدالملک الحوثی کو اپنی حکومت کے دیگر ارکان سے ملاقات کے لیے “دوسری دنیا بھیجا جائے گا” اور صنعا میں حوثیوں کے جھنڈے پر درج نعرہ “الموت لإسرائیل” کی جگہ اسرائیل کا پرچم لہرایا جائے گا۔پس منظر یہ دھمکی ایسے وقت میں سامنے آئی ہے جب اسرائیل اور یمن کے حوثیوں کے درمیان کشیدگی شدت اختیار کر گئی ہے۔ ایک روز قبل اسرائیلی فوج نے اعلان کیا تھا کہ یمن سے داغا گیا ایک میزائل فضا میں ہی تباہ کر دیا گیا، جبکہ ایک ڈرون نے جنوبی اسرائیل کے شہر ایلات کو نشانہ بنایا۔اسرائیلی فوج کے مطابق میزائل کو روکنے کے بعد کئی علاقوں میں سائرن بج اٹھے۔ حوثی گروپ نے ان حملوں کی ذمہ داری قبول کرتے ہوئے دعویٰ کیا کہ انہوں نے اسرائیل کے خلاف تین کارروائیاں کی ہیں جن میں میزائل اور ڈرون حملے شامل ہیں۔
