بھارتی ریاست پنجاب کے شہر لدھیانہ میں شادی کے لیے آنے والی 71 سالہ بھارتی نژاد امریکی خاتون کو قتل کر کے لاش جلا دی گئی۔بھارتی میڈیا کے مطابق مقتولہ روپندر کور پنڈھر شادی کے مقصد سے لدھیانہ پہنچی تھیں جہاں ان کی شادی 75 سالہ برطانوی شہری چرن جیت سنگھ گریوال سے طے تھی۔ تاہم مبینہ طور پر اسی شخص نے خاتون کو قتل کروا دیا۔پولیس تحقیقات کے مطابق قتل جولائی میں ہوا لیکن واقعہ اس وقت منظرِ عام پر آیا جب مقتولہ کی بہن کمل کور خیرہ نے اس کا فون مسلسل بند ہونے پر 28 جولائی کو نئی دہلی میں امریکی سفارتخانے کو اطلاع دی۔ سفارتخانے کے کہنے پر مقامی پولیس نے تحقیقات شروع کیں۔پولیس نے کارروائی کرتے ہوئے سکھجیت سنگھ سونو کو گرفتار کیا جس نے اعتراف جرم کرتے ہوئے بتایا کہ اس نے خاتون کو اپنے گھر میں قتل کرنے کے بعد لاش کو اسٹور روم میں جلا دیا۔ ملزم نے انکشاف کیا کہ یہ قتل چرن جیت سنگھ گریوال کے کہنے پر کیا گیا تھا، جس کے بدلے 50 لاکھ روپے ادا کیے گئے۔تحقیقات میں یہ بھی سامنے آیا ہے کہ مقتولہ نے بھارت آنے سے پہلے چرن جیت سنگھ گریوال کو بڑی رقم منتقل کی تھی، اور قتل کی اصل وجہ مالی مفاد تھا۔
