لاہور:دریائے چناب، راوی اور ستلج میں سیلابی ریلوں کے باعث جھنگ اور چنیوٹ کو ممکنہ تباہی سے بچانے کے لیے رواز پل کو توڑنے کا فیصلہ کر لیا گیا

لاہور:دریائے چناب، راوی اور ستلج میں سیلابی ریلوں کے باعث جھنگ اور چنیوٹ کو ممکنہ تباہی سے بچانے کے لیے رواز پل کو توڑنے کا فیصلہ کر لیا گیا۔

چیف سیکریٹری پنجاب زاہد اختر زمان کی زیرصدارت پی ڈی ایم اے کے کمیٹی روم میں اہم اجلاس ہوا، جس میں صوبائی وزراء صحت خواجہ سلمان رفیق اور خواجہ عمران نذیر نے ویڈیو لنک کے ذریعے شرکت کی۔ ریلیف کمشنر پنجاب نبیل جاوید اور ڈی جی پی ڈی ایم اے عرفان علی کاٹھیا بھی شریک ہوئے۔

اجلاس میں فیصلہ کیا گیا کہ جھنگ اور چنیوٹ کے تحفظ کے لیے رواز پل کو فوری طور پر بریچ کیا جائے گا، جبکہ ننکانہ صاحب، شیخوپورہ اور ٹوبہ ٹیک سنگھ کے دریائی بیلٹ کے علاقوں کو خالی کرانے کے احکامات بھی جاری کر دیے گئے۔

مزید برآں، سیلاب سے متاثرہ اضلاع میں اضافی انتظامی افسران تعینات کرنے اور تعلیمی ادارے ایک ہفتے کے لیے بند کرنے پر غور کیا گیا۔ سیلاب متاثرین کے لیے کلینک آن ویلز کو فوری طور پر روانہ کرنے کے احکامات بھی دیے گئے۔

چیف سیکریٹری پنجاب نے کہا کہ وزیراعلیٰ پنجاب کی ہدایات کے مطابق ریسکیو و ریلیف سامان کی تمام ڈیمانڈز پوری کی جا رہی ہیں۔ انہوں نے ٹینٹ ویلیجز قائم کرنے کی ہدایت کرتے ہوئے کہا کہ ان میں بنیادی سہولیات اور طبی امداد یقینی بنائی جائے۔

زاہد اختر زمان نے تمام اداروں کی کاوشوں کو سراہتے ہوئے کہا کہ متاثرہ علاقوں میں مویشیوں کے چارے اور ویکسین کی فراہمی بھی یقینی بنائی جائے، جبکہ محکمہ لائیو اسٹاک ونڈہ چارہ فراہم کرنے کا پابند ہو گا۔

اجلاس میں ہدایت دی گئی کہ میڈیکل کیمپس میں ضروری ادویات اور سانپ کے کاٹنے کی ویکسین وافر مقدار میں موجود ہونی چاہیے۔

ڈی جی پی ڈی ایم اے نے اجلاس کو بریفنگ دیتے ہوئے بتایا کہ مون سون کے نویں اسپیل کے دوران گجرانوالہ، لاہور، راولپنڈی، سرگودھا، فیصل آباد، ڈیرہ غازی خان، بہاولپور، بہاولنگر اور ساہیوال میں بارشیں متوقع ہیں۔

انہوں نے کہا کہ دریائے چناب میں پانی کا بڑا ریلا جھنگ کی طرف بڑھ رہا ہے، جبکہ دریائے راوی میں 2 لاکھ 17 ہزار کیوسک کا سیلابی ریلا رواں دواں ہے، تاہم آئندہ چند گھنٹوں میں بہاؤ میں کمی کا امکان ہے۔