کراچی : بحیرہ عرب میں بننے والے طوفان بائپر جوائے نے انتہائی شدت اختیار کرنے کے باعث کراچی کے ساحل پر دفعہ 144 نافذ کردی گئی۔ میڈیا رپورٹس کے مطابق بحیرہ عرب میں بننے والے طوفان بائپر جوائے نے مزید شدت اختیار کرلی ہے، اس وقت طوفان کراچی سے 770 کلومیٹر دور ہے اور تیزی سے آگے بڑھ رہا ہے، شہریوں کی حفاظت کے پیش نظر کراچی کی ضلع انتظامیہ نے الرٹ جاری کرتے ہوئے ساحل سمندر پر دفعہ 144 نافذ کر دی ہے۔ڈپٹی کمشنر سجاول نے کہا ہے کہ ماہی گیر کھلے سمندر میں شکار کے لیے گریز کریں کیوں کہ سمندر کی صورتحال انتہائی خطرناک ہے اور اونچی لہریں پیدا ہونے کا خدشہ ہے جب کہ سمندر میں موجود ماہی گیروں کو محفوظ مقام پر جانے کی ہدایت کردی گئی ہے، سمندری طوفان بدھ یا جمعرات تک سندھ اور مکران کے ساحلوں سے ٹکرا جائے گا، جس سے ساحلی علاقوں میں گرج چمک کے ساتھ بارش کا امکان ہے، طوفان کے باعث ڈیڑھ سو کلو میٹر رفتار کی ہوائیں چلیں گی، جس کی وجہ سے کمزور تعمیرات کو نقصان کا خدشہ ہے۔معلوم ہوا ہے کہ بحیرہ عرب میں سمندری طوفان بیپر جوائے کے حوالے سے بھارتی محکمہ موسمیات نے آئندہ 6 گھنٹے اہم قرار دیتے ہوئے ساحلی ریاستوں میں الرٹ جاری کر دیا ہے، آئی ایم ڈی نے پیشگوئی کی ہے کہ طوفان اگلے 6 گھنٹوں میں ’انتہائی شدید‘ سائیکلونک اسٹام کے طور پر شدت اختیار کرے گا۔ علاوہ ازیں برسوں بعد جون میں “ایل نینو” سمندری رجحان کی واپسی کی پیش گوئی کی گئی ہے، جس کی وجہ سے پاکستان سمیت20 ممالک ضرورت سے زیادہ بارشوں کے خطرے سے دوچار ہیں جب کہ 42 ممالک کو خشک سالی کے اثرات کا بھی خطرہ ہونے کا انکشاف کیا گیا ہے، یہ بات اقوامِ متحدہ کی تنظیم برائے خوراک و زراعت کے عالمی معلوماتی اور انتباہی سسٹم کی تیار کردہ ایک رپورٹ میں سامنے آئی ہے۔
