سندھ کے معروف شاعر اور دانشور ڈاکٹر آکاش انصاری کے قتل کیس کا فیصلہ سنا دیا گیا۔ ایڈیشنل سیشن جج حیدرآباد نے کیس کا تفصیلی فیصلہ سناتے ہوئے مقتول کے سوتیلے بیٹے شاہ لطیف کو سزائے موت کا حکم دے دیا۔عدالتی فیصلے میں کہا گیا ہے کہ ڈاکٹر آکاش انصاری کو ان کے سوتیلے بیٹے شاہ لطیف نے ذاتی وجوہات کی بنا پر قتل کیا۔ عدالت نے قرار دیا کہ استغاثہ ملزم کے خلاف قتل کا الزام ثابت کرنے میں مکمل طور پر کامیاب رہا۔عدالت میں پیش کیے گئے شواہد، گواہوں کے بیانات اور دیگر ریکارڈ کی روشنی میں ایڈیشنل سیشن جج نے ملزم کو قتل کا مجرم قرار دیتے ہوئے جرم کی سنگینی کے پیش نظر سزائے موت سنائی۔واضح رہے کہ ڈاکٹر آکاش انصاری کا شمار سندھ کے نامور شعرا اور دانشوروں میں ہوتا تھا، ان کے قتل کے واقعے نے سندھ بھر میں شدید تشویش، غم اور غصے کی فضا پیدا کر دی تھی۔
