نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 2 سے 3 روز کے دوران ممکنہ بارشوں اور متوقع موسمی صورتحال کے حوالے سے ایڈوائزری جاری کر دی ہے۔این ڈی ایم اے کے مطابق آج رات پاکستان میں داخل ہونے والی مغربی ہواؤں کے باعث ملک کے بیشتر علاقوں میں بارش جبکہ پہاڑی علاقوں میں برفباری متوقع ہے۔ مغربی ہواؤں کا یہ سلسلہ 30 دسمبر کو مزید شدت اختیار کرے گا، جس کے زیرِ اثر 31 دسمبر کو بالائی اور وسطی علاقوں میں بارش کا امکان ہے، جبکہ اس کے اثرات 2 جنوری کی صبح تک برقرار رہ سکتے ہیں۔ناران، کاغان، سوات، دیر، کوہستان، مری گلیات، اسکردو، ہنزہ اور دیگر پہاڑی علاقوں میں شدید برفباری متوقع ہے، جس کے باعث رابطہ سڑکوں کی بندش کا خدشہ ظاہر کیا گیا ہے۔ بالائی خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور برفانی تودے گرنے کا بھی امکان ہے۔ممکنہ موسمی صورتحال کے پیش نظر این ڈی ایم اے نے سیاحوں اور مسافروں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے۔ تاہم بارشوں کے باعث وسطی و جنوبی پنجاب اور بالائی سندھ میں دھند کی شدت میں کمی متوقع ہے۔این ڈی ایم اے نے پی ڈی ایم ایز، جی بی ڈی ایم اے، ایس ڈی ایم اے اور ضلعی انتظامیہ کو الرٹ رہنے کی ہدایت کرتے ہوئے ہنگامی ریسپانس ٹیمیں تیار رکھنے اور پیشگی حفاظتی اقدامات یقینی بنانے پر زور دیا ہے۔ ادارہ صورتحال کی مسلسل نگرانی کر رہا ہے جبکہ عوام سے اپیل کی گئی ہے کہ تازہ موسمی معلومات اور حفاظتی ہدایات کے لیے پاک این ڈی ایم اے ڈیزاسٹر الرٹ ایپ سے رہنمائی حاصل کریں۔
