ضلع کرک کے تھانہ گرگری کی حدود امان کوٹ میں دہشتگردوں کی فائرنگ کے نتیجے میں پولیس کے 5 اہلکار شہید ہو گئے۔ پولیس ذرائع کے مطابق شہید ہونے والوں میں شاہد اقبال، عارف، صفدر اور دیگر اہلکار شامل ہیں۔پولیس کا کہنا ہے کہ پولیس موبائل تیل و گیس کی تلاش میں مصروف ایک کمپنی کی سیکیورٹی پر مامور تھی کہ دہشتگردوں نے اچانک حملہ کر دیا۔ واقعے کے بعد علاقے میں ملزمان کی گرفتاری کے لیے سرچ آپریشن شروع کر دیا گیا ہے۔وفاقی وزیر داخلہ محسن نقوی نے کرک میں پولیس موبائل پر فائرنگ کے واقعے کی شدید مذمت کرتے ہوئے کہا کہ دورانِ ڈیوٹی 5 پولیس اہلکاروں کی شہادت پر گہرے دکھ اور افسوس کا اظہار کرتا ہوں۔وزیر داخلہ نے شہید اہلکاروں کو خراجِ عقیدت پیش کرتے ہوئے ان کے لواحقین سے دلی ہمدردی اور تعزیت کا اظہار کیا۔ ان کا کہنا تھا کہ پولیس اہلکاروں نے فرض کی راہ میں جان قربان کر کے عظیم مثال قائم کی ہے۔محسن نقوی نے مزید کہا کہ سیکیورٹی پر مامور اہلکاروں پر حملہ درندہ صفت عناصر کی کھلی بربریت ہے، شہداء کی قربانیاں رائیگاں نہیں جائیں گی اور ریاست پوری قوت سے جواب دے گی۔واضح رہے کہ رواں ماہ بنوں میں تھانہ ہوید کی شیخ لنڈک پولیس چوکی پر بھی دہشتگرد حملہ کیا گیا تھا، جس میں 5 پولیس اہلکار زخمی ہوئے تھے۔
