کوٹری میں شادی کی ایک تقریب کے دوران جعلی کرنسی نوٹس دینے کا انوکھا اور تشویشناک واقعہ سامنے آ گیا، جس کے بعد تقریب کے منتظمین میں شدید پریشانی پھیل گئی۔
رپورٹس کے مطابق یہ واقعہ کوٹری کے قریب واقع واپڈا کالونی میں منعقد ہونے والی شادی کی تقریب میں پیش آیا، جہاں مہمان تحائف کے ساتھ ساتھ نقد رقم بھی دے رہے تھے۔ تقریب کے داخلی دروازے پر موجود عملہ مہمانوں سے لفافوں میں دی گئی رقم وصول کر رہا تھا۔
تقریب کے اختتام پر جب جمع کی گئی رقم کی گنتی کی گئی تو انکشاف ہوا کہ پانچ ہزار روپے مالیت کے متعدد نوٹس جعلی ہیں۔ ذرائع کے مطابق مجموعی طور پر پانچ ہزار روپے کے 11 جعلی نوٹس سامنے آئے، جن کی مجموعی رقم 55 ہزار روپے بنتی ہے۔
مزید بتایا گیا کہ بعض افراد نے پانچ ہزار روپے کا جعلی نوٹ دے کر اس کے بدلے چار ہزار روپے واپس بھی لیے، جس کے نتیجے میں تقریب کے منتظمین کو بھاری مالی نقصان اٹھانا پڑا۔ ابتدائی معلومات کے مطابق اس طریقہ واردات کے ذریعے تقریباً 44 ہزار روپے کا فراڈ کیا گیا۔
واقعے کے بعد انتظامیہ نے فوری طور پر سی سی ٹی وی کیمروں کی فوٹیج حاصل کر لی ہے اور جعلی نوٹس دینے والے افراد کی شناخت کا عمل شروع کر دیا گیا ہے۔ ذرائع کا کہنا ہے کہ ملوث افراد کے خلاف قانونی کارروائی پر بھی غور کیا جا رہا ہے۔
منتظمین کا کہنا ہے کہ شادی جیسی خوشی کی تقریب میں اس نوعیت کی واردات نے خوشیوں کو ماند کر دیا، جبکہ شہریوں کو بھی ہدایت کی گئی ہے کہ وہ کسی بھی تقریب میں نقد رقم لیتے یا دیتے وقت احتیاط برتیں اور کرنسی نوٹس کی تصدیق ضرور کریں۔
