اسلام آباد: نومبر کی ماہانہ فیول ایڈجسٹمنٹ کے تحت بجلی کی قیمت میں 72 پیسے فی یونٹ کمی کا امکان ظاہر کیا جا رہا ہے۔ اس حوالے سے سینٹرل پاور پرچیزنگ ایجنسی (سی پی پی اے) نے درخواست دائر کر دی ہے، جس پر نیشنل الیکٹرک پاور ریگولیٹری اتھارٹی (نیپرا) 31 دسمبر کو سماعت کرے گی سی پی پی اے کے مطابق نومبر کے دوران ڈسکوز کو 7 ارب 81 کروڑ 30 لاکھ یونٹس بجلی فراہم کی گئی، جس پر فی یونٹ لاگت 6 روپے 16 پیسے رہی۔ اعداد و شمار کے مطابق نومبر میں بجلی کی پیداوار کا 39.16 فیصد پانی سے، 9.34 فیصد مقامی کوئلے سے، 5.06 فیصد درآمدی کوئلے سے اور 8.44 فیصد گیس سے حاصل کیا گیا، جبکہ درآمدی ایل این جی سے 8.64 فیصد بجلی پیدا کی گئی۔ سی پی پی اے کا مزید کہنا ہے کہ نومبر کے دوران جوہری ایندھن سے 25.23 فیصد بجلی پیدا کی گئی، جس سے مجموعی پیداواری لاگت میں کمی واقع ہوئی۔
اگر نیپرا نے درخواست منظور کر لی تو صارفین کو بجلی کے بلوں میں ریلیف ملنے کا امکان ہے۔
