کراچی: ای چالان سے بچنے کے لیے جعلی نمبر پلیٹ، فینسی یا بغیر نمبر پلیٹ گاڑی اور موٹرسائیکل چلانے والے شہری ہوشیار ہو جائیں۔ پولیس نے اس رجحان کے خلاف سخت کارروائی کا اعلان کر دیا ہے۔ایڈیشنل آئی جی کراچی جاوید عالم اوڈھو نے چیف سی پی ایل سی اور ایکسائز حکام کے ہمراہ نیوز کانفرنس کرتے ہوئے کہا کہ نمبر پلیٹ استعمال نہ کرنے یا جعلی نمبر پلیٹ لگانے والوں کے خلاف بلاامتیاز کارروائی کی جائے گی۔ انہوں نے کہا کہ شہری ای چالان سے بچنے کے لیے جعلی یا غائب نمبر پلیٹ کا استعمال کر رہے ہیں، جس کے خلاف آئندہ جمعہ سے خصوصی مہم شروع کی جا رہی ہے۔جاوید عالم اوڈھو کا کہنا تھا کہ اس مہم میں ایکسائز ڈپارٹمنٹ اور سی پی ایل سی کے ساتھ مل کر کام کیا جائے گا، شہریوں کو آگاہی بھی دی جائے گی اور خلاف ورزی پر جرمانے عائد کیے جائیں گے۔انہوں نے بتایا کہ ٹریکنگ سسٹم کے آغاز سے ٹریفک نظام میں واضح بہتری آئی ہے، موٹرسائیکل سواروں میں ہیلمٹ کے استعمال میں اضافہ ہوا ہے جبکہ ٹریفک جرمانوں کے حوالے سے مزید مشاورت جاری ہے۔ ایڈیشنل آئی جی کراچی نے واضح کیا کہ جعلی، فینسی یا گرین نمبر پلیٹ لگانے والوں کے خلاف مقدمہ درج کیا جائے گا۔ ان کا کہنا تھا کہ اگر کسی شہری نے ایکسائز سے نمبر پلیٹ کے لیے رابطہ کیا ہے تو رسید کا ہونا لازمی ہوگا، بصورت دیگر قانونی نمبر پلیٹ نہ ہونے پر گاڑی یا موٹرسائیکل عارضی طور پر ضبط کر لی جائے گی۔ انہوں نے مزید بتایا کہ کراچی میں اب تک تقریباً ایک لاکھ ای چالان جاری کیے جا چکے ہیں، جبکہ سہولت مراکز سے 36 ہزار کے قریب شہریوں نے رجوع کیا جن کے مسائل حل کیے گئے۔ پہلے چالان پر دی جانے والی رعایت کے مثبت نتائج سامنے آ رہے ہیں اور سندھ حکومت کی مکمل حمایت حاصل ہے۔ موقع پر چیف سی پی ایل سی زبیر حبیب نے کہا کہ جدید ٹیکنالوجی کے دور میں بچ نکلنا ممکن نہیں، شہری پولیس کے ساتھ تعاون کریں کیونکہ یہ تمام اقدامات عوام کی بہتری کے لیے ہیں۔انہوں نے بتایا کہ ٹریفک حادثات میں نمایاں کمی آئی ہے، سیٹ بیلٹ کے استعمال میں اضافہ ہوا ہے اور مجموعی طور پر ٹریفک سسٹم میں بہتری نظر آ رہی ہے۔
