کراچی: محکمہ موسمیات کے مطابق آئندہ ہفتے سے کراچی میں درجہ حرارت میں مزید کمی متوقع ہے اور سردی کی شدت میں اضافہ ہو سکتا ہے۔ آج صبح کم سے کم درجہ حرارت 13.5 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 30 ڈگری تک پہنچ سکتا ہے۔ شمال مشرق سے ہواؤں کی رفتار میں کمی اور نمی کا تناسب 78 فیصد ہے۔محکمہ موسمیات نے خبردار کیا ہے کہ شمالی علاقوں میں شدید سرد ہوائیں اور برف باری متوقع ہیں، جس سے نظامِ زندگی متاثر ہونے کا امکان ہے۔ چترال، دیر، سوات، گلگت بلتستان، ناران، کاغان، استور، اسکردو، ہنزہ، چلاس اور غذر میں راستے بند ہونے یا لینڈ سلائیڈنگ کا خطرہ ہو سکتا ہے۔ شہریوں کو ہدایت کی گئی ہے کہ پہاڑی علاقوں میں غیر ضروری سفر سے گریز کریں اور قراقرم ہائی وے پر بھی احتیاط برتیں۔محکمہ موسمیات کے مطابق 19 دسمبر سے ملک میں سرد ہواؤں کا نیا سلسلہ داخل ہوگا، جس سے رات کے درجہ حرارت میں مزید کمی اور شدید یخ بستہ موسم کا امکان ہے۔ بعض نشیبی علاقوں میں دھند اور حدِ نگاہ متاثر ہونے کا بھی امکان ہے۔
