پاکستان نے اقوام متحدہ کے انسانی حقوق کے ادارے کے حالیہ بیان کو رد کرتے ہوئے اسے بے بنیاد اور غیر معقول قرار دیا ہے۔
ترجمان وزارت خارجہ کے مطابق پاکستانی پارلیمنٹ نے اکثریتی ووٹوں سے 27 ویں آئینی ترمیم منظور کی، تاہم اس حوالے سے جاری بیان میں پاکستان کے نقطہ نظر اور زمینی حقائق کی عکاسی نہیں کی گئی۔ترجمان نے واضح کیا کہ جمہوری ممالک کی طرح پاکستان میں بھی آئین میں ترمیم اور قانون سازی کا اختیار منتخب نمائندوں کے پاس ہے، اور جمہوریت و آئینی عمل شہری و سیاسی حقوق کی بنیاد ہیں جن کا احترام ضروری ہے۔وزارت خارجہ نے مزید کہا کہ پاکستان اپنے آئین میں درج انسانی حقوق اور بنیادی آزادیوں کے تحفظ کے لیے پرعزم ہے اور ہائی کمشنر کو پاکستانی پارلیمنٹ کے خود مختار فیصلوں کا احترام کرنا چاہیے۔ترجمان نے ہائی کمشنر سے کہا کہ ایسے بیانات سے گریز کیا جائے جن میں سیاسی تعصب یا غلط معلومات شامل ہوں۔ پاکستان کی نئی آئینی ترمیم آئین میں طے شدہ شفاف طریقہ کار کے مطابق ہے۔
