خیبرپختونخوا حکومت نے ہریپور میں ہونے والے ضمنی انتخاب میں مبینہ دھاندلی کی شکایت پر مکمل انکوائری کا فیصلہ کر لیا ہے۔
صوبائی اطلاعاتی مشیر شفیع جان کے مطابق وزیر اعلیٰ سہیل آفریدی نے حکم دیا ہے کہ انکوائری کلاس فور سے لے کر ڈپٹی کمشنر تک کی جائے، اور اگر کوئی بھی ملوث پایا گیا تو سخت کارروائی ہوگی۔شفیع جان نے کہا کہ اگرچہ ہمیں یقین ہے کہ ہمارے ماتحت افسران ملوث نہیں ہیں، پھر بھی شفافیت کے لیے انکوائری کی جا رہی ہے۔ انہوں نے مزید بتایا کہ انتخابی کمیشن کو ہریپور ضمنی انتخاب میں دھاندلی کے حوالے سے ریفرنس بھی بھیجا جا رہا ہے اور پریزائیڈنگ افسران کے حلفیہ بیانات بھی حاصل کیے جا رہے ہیں۔یاد رہے کہ ہریپور قومی اسمبلی کے حلقہ این اے 18 میں حالیہ ضمنی انتخاب میں پی ٹی آئی کے رہنما عمر ایوب خان کی بیوی کو مسلم لیگ (ن) کے بابر نواز خان نے شکست دی تھی۔ پاکستان تحریک انصاف نے الزام لگایا تھا کہ ان کے حمایت یافتہ امیدوار کو 25 ہزار ووٹوں سے کامیابی حاصل ہوئی، مگر فارم 47 میں اسے شکست دی گئی۔
