صادق آباد میں پولیس اور ڈاکوؤں کے درمیان مبینہ مقابلہ ہوا جس کے نتیجے میں 2 ڈاکو ہلاک ہوگئے۔ پولیس کے مطابق مقابلے کے بعد جائے وقوعہ سے اسلحہ اور چھینی گئی موٹرسائیکل بھی برآمد ہوئی، جبکہ ہلاک ڈاکوؤں کی شناخت کا عمل جاری ہے پولیس حکام کا کہنا ہے کہ دونوں ملزمان کی لاشیں اسپتال منتقل کردی گئیں۔ واقعہ اس وقت پیش آیا جب موٹرسائیکل سوار ڈاکوؤں نے ناکہ پر رکنے کے بجائے پولیس پر فائرنگ کردی، جس پر پولیس نے جوابی کارروائی کی اور دونوں ڈاکو مارے گئے ادھر پچھلے دنوں کراچی کے علاقوں قائدآباد اور زمان ٹاؤن میں بھی پولیس اور ملزمان کے درمیان الگ الگ مبینہ مقابلے ہوئے تھے جس میں دو ڈاکو زخمی حالت میں گرفتار کیے گئے۔ پولیس نے دونوں واقعات میں اسلحہ اور دیگر لوٹا ہوا سامان بھی برآمد کیا پہلا واقعہ قائدآباد میں پیش آیا جہاں احسن آباد گراؤنڈ کے قریب مبینہ مقابلے کے بعد ایک زخمی ڈاکو خالد کو گرفتار کیا گیا، جسے فوری طور پر جناح سپتال منتقل کیا گیا۔ پولیس نے موقع سے اسلحہ اور لوٹا ہوا سامان برآمد کرلیا دوسرا مقابلہ زمان ٹاؤن کے علاقے میں کورنگی ناصر جمپ کے قریب ہوا، جہاں فائرنگ کے تبادلے کے بعد ایک ڈاکو زخمی حالت میں گرفتار ہوا۔ اسے بھی جناح اسپتال منتقل کردیا گیا جبکہ پولیس نے اسلحہ برآمد کرلیا۔
