اسلام آباد کی ڈسٹرکٹ اینڈ سیشن کورٹ نے سابق وزیراعلیٰ خیبر پختونخوا علی امین گنڈا پور کو گرفتار کرکے پیش کرنے کا حکم دے دیا۔ تفصیلات کے مطابق عدالت میں شراب اور اسلحہ برآمدگی کیس کی سماعت جوڈیشل مجسٹریٹ مبشر حسن چشتی نے کی۔ سماعت کے دوران علی امین گنڈا پور عدالت میں پیش نہ ہوئے جبکہ ان کے وکیل راجہ ظہور الحسن بھی غیر حاضر رہے۔ عدالت نے ملزم کی مسلسل غیر حاضری پر برہمی کا اظہار کرتے ہوئے ان کے وارنٹ گرفتاری جاری کر دیے۔ عدالت نے پولیس کو ہدایت کی کہ علی امین کو گرفتار کرکے آئندہ سماعت پر پیش کیا جائے۔ کیس کی مزید سماعت 11 نومبر تک ملتوی کر دی گئی۔ یاد رہے کہ علی امین گنڈا پور کے خلاف تھانہ بارہ کہو میں شراب اور اسلحہ برآمدگی کا مقدمہ درج ہے۔
