ڈسٹرکٹ اینڈ سیشن کورٹ اسلام آباد نے پاکستان تحریکِ انصاف کے بانی عمران خان کو آئندہ سماعت پر عدالت میں یا ویڈیو لنک کے ذریعے پیش کرنے کا حکم دے دیا۔ایڈیشنل ڈسٹرکٹ اینڈ سیشن جج محمد افضل مجوکہ نے پی ٹی آئی بانی عمران خان اور ان کی اہلیہ بشریٰ بی بی کے خلاف 9 مئی کے واقعات اور دیگر پانچ مقدمات کی سماعت کی۔ عدالت کو بتایا گیا کہ اڈیالہ جیل انتظامیہ نے شوکاز نوٹس کا جواب تاحال جمع نہیں کرایا۔عدالت نے سماعت 25 نومبر تک ملتوی کرتے ہوئے دونوں کی عبوری ضمانت میں توسیع کر دی۔واضح رہے کہ پی ٹی آئی بانی عمران خان کے خلاف 9 مئی، قتل کا ارادہ اور جعلی رسیدوں سمیت متعدد مقدمات درج ہیں، جبکہ بشریٰ بی بی کے خلاف مبینہ طور پر جعلی رسیدیں جمع کرانے پر مقدمہ قائم کیا گیا ہے۔
