اسلام آباد: عالمی مالیاتی فنڈ (آئی ایم ایف) نے پاکستان کے ٹیکس ہدف میں 150 ارب روپے کی کمی پر رضامندی ظاہر کر دی ہے، جس کے بعد عوام پر منی بجٹ کے خطرات فی الحال ختم ہو گئے ہیں۔ ذرائع کے مطابق پاکستان اور آئی ایم ایف کے درمیان حالیہ مذاکرات میں نئے ٹیکس عائد کرنے کے بجائے ٹیکس ٹارگٹ میں نرمی پر اتفاق ہوا، جبکہ پاکستان نے مؤقف اختیار کیا کہ سیلابی نقصانات اور معاشی دباؤ کے باعث مزید ٹیکس عوام پر اضافی بوجھ ڈالیں گے۔ ذرائع کا کہنا ہے کہ اس پیشرفت کے بعد ایف بی آر کا ٹیکس ہدف 14 ہزار 131 ارب روپے سے کم کر کے 13 ہزار 981 ارب روپے مقرر کیا گیا ہے۔ ایف بی آر کو رواں مالی سال کی پہلی سہ ماہی میں 199 ارب روپے کے شارٹ فال کا سامنا رہا، تاہم آئی ایم ایف نے ٹیکس ٹو جی ڈی پی ریشو 11 فیصد تک بڑھانے پر زور دیا ہے۔ ذرائع کے مطابق ٹیکس ہدف میں نرمی سے عوام پر فوری طور پر منی بجٹ کا دباؤ ٹل گیا ہے۔
